२ माघ, विराटनगर । मोरङ जिल्ला कारागारमा रहेका कैदी (चौकीदार) अभिषेक गिरीलाई मकवानपुरस्थित कारागार स्थानान्तरण गरिने भएको छ ।
गिरीलाई मकवानपुरको भीमफेदी कारागारमा स्थानान्तरण गर्ने गरी विराटनगर कारागारमा पत्राचार भएको बताइएको छ । उनलाई गृह मन्त्रालयको निर्देशनमा सरुवा गरिएको कारागार स्रोतले जनाएको छ ।
गिरी स्वयंले पनि मोरंग कारागारमा आफ्नो समय अझै बाँकी भएपनि राजनीतिक चासोका कारण स्थानान्तरण गरिएको बताएका छन् ।
मोरङका प्रमुख जिल्ला अधिकारी काशीराज दाहालका अनुसार गिरीको सरुवाका लागि तयारी गर्न कारागारलाई निर्देशनसमेत दिइसकिएको छ ।
कारागार व्यवस्थापन विभागका महानिर्देशक चक्रपाणी पाण्डेले पनि गिरीलाई मोरङ कारागारबाट भीमफेदी सरुवा गर्न पत्राचार भएको बताएका छन् ।
सोमबार नै गिरीको सरुवा गर्ने भनिएता पनि सार्वजनिक बिदाका कारण गिरीको सरुवा प्रक्रिया अघि बढाउन नसकेको मोरङ कारागारले जनाएको छ ।
कारागारका निमित्त जेलर तुलसीराम भगतले कार्यालय खुलेपछि प्रक्रिया पूरा गर्दै स्थानान्तरण गरिने जानकारी दिएका छन् ।
गिरीले भने मोरंग कारागारमा राजनीति हुने गरेको भन्दै आफूले कैद भुक्तान गर्न अब मात्रै केही महिना बाँकी रहेको अवस्थामा स्थानान्तरण गरिनु आफूलाई दुःख दिने नियत मात्रै भएको बताएका छन् ।
अपहरण तथा शरीर बन्धक मुद्दामा कैद सजाय भुक्तान गरिरहेका गिरी २०७८ मंसिर ९ गते मोरङ कारागार सरुवा भएर आएका थिए । उनलाई डिल्ली बजार कारागारबाट स्थानान्तरण गरिएको थियो । उनलाई त्यसअघि २०७४ मा मोरङबाटै डिल्लीबजार स्थानान्तरण गरिएको थियो ।
गिरीलाई २०७१ साउनमा महानगरीय प्रहरी परिसर ललितपुरले अपहरण तथा शरीर बन्धकको आरोपमा पक्राउ गरेको थियो ।
