९ माघ,एजेन्सी ।
कोरोना भाइरसको उदगमस्थल मानिने चीनमा फेरि संक्रमण दर बढेको छ । पछिल्लो १ हप्तामा मात्रै कोरोनाबाट १३ हजार जनाको मृत्यु भएको छ । जनवरी १३–१९ को अवधिमा १३ हजार जनाले कोरोनाबाट ज्यान गुमाएका हुन् । चीनमा हालसम्म ८० प्रतिशत जनसंख्यामा कोरोना संक्रमण फैलिसकेको बताइएको छ ।
गत जनवरीसम्म कोभिडका कारण ६० हजार मानिसको मृत्यु भइसकेको सेन्टर्स फर डिजिज कन्ट्रोल सीडीसीले जनाएको छ । सीडीसीका अनुसार चीनले डिसेम्बरको पहिलो हप्ता कोभिड नीति अन्त्य गरेपछि संक्रमण दर बढ्दै गएको हो । लामो समयसम्म चर्को विरोध भएपछि चीनले लागू गरेको शून्य कोभिड नीति फिर्ता लिएको थियो ।
कोभिड पोजिटिभ व्यक्तिहरुलाई क्वारेन्टाइन शिविरमा बस्न बाध्य पारिएपछि चौतर्फी विरोध भएको थियो । उता जापानले कोभिड–१९ लाई मौसमी इन्फ्लुएन्जाको श्रेणीमा झार्ने भएको छ । प्रधानमन्त्री फुमियो किसिदाले यसबारे जानकारी दिएका हुन् । किसिदाले यस कदमको नतिजा हेर्न आफ्नो प्रशासन र स्वास्थ्य मन्त्रालयलाई निर्देशन पनि दिएका छन् ।
जापानमा अहिले कोभिडलाई दोस्रो श्रेणी दिइएको छ । यस श्रेणी क्षयरोग र एभियन इन्फ्लुएन्जा बराबर छ । यसबाहेक अधिकारीहरूले यसलाई मौसमी इन्फ्लुएन्जाको बराबरीमा पाँचौँ स्थानमा राख्ने योजना बनाएको जापानको स्वास्थ्य मन्त्रालयलाई उद्धृत गर्दै समाचार समिति सीएनएनले जनाएको छ । जापानमा अझै पनि प्रतिदिन एक लाख कोरोना भाइरस सङ्क्रमणहरु देखापर्ने गरेको छ ।
