२० वैशाख, एजेन्सी ।
भारतमा जारी आईपिएलमा लखनऊ सुपर जाइन्ट्स र रोयल च्यालेन्जर्स बैंगलोरको खेल अहिले सिंगो भारतीय क्रिकेट क्षेत्र र यसका समर्थकहरुलागि चर्चाको मुख्य विषय बनेको छ । यसको कारण यो खेलमा निकै विवाद भएको थियो । कहिले आरसीबीका विराट कोहली र लखनऊका नवीन उल हकबीच झगडा भयो भने कहिले विराट र लखनऊका मेन्टर गौतम गम्भीरबीच वहस भयो ।
यी विवादपछि समर्थकहरु दुई पक्षमा विभाजित भएका छन् । कसैले विराटको पक्ष लिइरहेका छन् भने कोहीले नवीन–गम्भिरको पक्ष लिइरहेका छन् । तर, यो विवादमा कोहली र गम्भिरबीच के कुराकानी भयो भन्ने उत्सुकता मेटाउदै एक प्रत्यक्षदर्शीले समाचार एजेन्सी पीटीआईलाई यो सम्पूर्ण घटनाको जानकारी दिएका छन्।
उनले विवादका क्रममा कोहली र गम्भीरबीच के कुराकानी भएको बताएका छन् । प्रत्यक्षदर्शीले भने– तपाईले टिभीमा देख्नु भएको होला कि जब विराट बाकी खेलाडीहरुसँग हात मिलाएर फर्कदै थिए, लखनउका मेर्यसले उनलाई केहि भनेका थिए । त्यसपछि मेर्यसले विराटलाई सोधे कि उनले आफ्नो टोलीलाई किन लगातार दुव्र्यवहार गरिरहेका छन् ?
विराटले जवाफ दिए कि उनले किन यो सुरु गरे र उनी (मेयर्स) किन उनलाई लगातार हेरिरहेका थिए ? यसअघि अमित मिश्राले विराटले नवीन उल हकलाई दुर्व्यवहार गरेको भन्दै अम्पायरसँग गुनासो गरेका थिए । प्रत्यक्षदर्शीले भनेका छन्, गम्भिरलाई लाग्यो मामिला बिग्रन सक्छ, त्यसैले उनले मेयर्सलाई ताने।
गौतमले उनीसँग नउल्झिन भनेका थिए । यसपछि विराटले केही भनेपछि दुवैबीच झगडा हुन थाल्यो । यसपछि गौतमले विराटलाई के भन्दै छस् भन् भने । त्यसमा विराटले भने– मैले तिमीलाई केही भनिनँ, तिमी किन बिचमा पछौं । गौतमले भने कि यदि तिमीले मेरो खेलाडीलाई गाली गरेका छौं भने यसको मतलब तिमीले मेरो परिवारलाई दुर्व्यवहार गरेका छौं ।
त्यसपछि विराटले भने, त्यसो हो भने आफ्नो परिवारलाई सुरक्षित राख । दुवै एकअर्काबाट अलग हुनुअघि गौतमले अब तिमी (विराट)ले मलाई सिकाउने बताएका थिए । प्रत्यक्षदर्शीहरुका अनुसार मामिला दुबैतर्फ बिग्रिएको थियो । तर, त्यसपछि दुवै टोलीका खेलाडीहरू मिलाउन आएका थिए । केही खेलाडीले कोहलीलाई लिएर गएका थिए भने केही खेलाडी गम्भिरलाई लिएर गएका थिए ।
मैदानको यो घटना पछि बीसीसीआईले तीनै कोहली, गंभीर र नवीनलाई कारबाही गरेको थियो। यी तीनै खेलाडी आईपीएलको नियम उल्लङ्घन गरेको आरोपमा दोषी ठहर भएका छन् । गम्भीर र कोहलीलाई खेल शुल्क काटिएको छ भने नवीन उल हकलाई खेल शुल्कको ५० प्रतिशत जरिवाना गरिएको छ ।
लखनउको इनिङ्सको १७औं ओभरमा विराट स्टम्पको पछाडिबाट दौडिएर नविनलाई केही इशारा गरेपछि सम्पूर्ण मामिला सुरु भएको थियो । त्यही बेला अफगानिस्तानका नवीन पनि उनको नजिक आएपछि दुईबीच झगडा सुरु भएको थियो ।
