२९ वैशाख, एजेन्सी ।
बेलायतले रुसी आक्रमणविरुद्ध युक्रेनलाई सहयोग गर्न लामो दूरीको क्रुज मिसाइलहरु युक्रेन पठाउन लागेको बताएको छ । विहीबार बेलायतका रक्षामन्त्री बेन वालेसले युक्रेनलाई स्टर्म स्याडो मिसाइलहरु दिन लागेको बताएका हुन् । स्टर्म स्याडो लामो दूरीमा लक्ष्य भेद्न सक्ने क्षमताको रहेको छ र यसको मार हान्ने क्षमता २५० किलोमिटरभन्दा अधिक छ ।
यसलाई विमानबाटै प्रक्षेपण गर्न सकिन्छ । बेलायतले भनेको छ कि, यि मिसाइलहरुको आपूर्तीपछि युक्रेनले आफ्नो क्षेत्रबाट रुसी सेनालाई पछि धकेल्न मद्यत गर्नेछ । युक्रेनी राष्ट्रपति भोलोदिमिर जेलेन्स्कीले अघिल्लो वर्ष युद्ध सुरु भएदेखि नै यस्ता हतियारहरुको माग गरिरहेका थिए ।
तर उनका अन्तर्राष्ट्रिय समर्थकहरु लामो दुरीको हतियार उनलाई दिन संकोच मानिरहेका थिए । उनीहरुलाई लागिरहेको थियो कि यसले झनै कटुता बढ्ने छ । तर वालेसले भने कि प्रधानमन्त्री रिऋी सुनकले यो निर्णय यसकारण लिए, किनभने रुस जानबुझी गैरसैन्य संरचना, आवासिय क्षेत्रहरुलाई पनि निशाना बनाइरहेको छ ।
वालेसले भने, यो वर्ष रुसी नेतृत्वले बमहरु, मिसाइलहरु र ड्रोनहरुको माध्यमबाट नागरिकहरु र गैरसैन्य संरचनालाई व्यवस्थित रुपले निशाना बनाउँन जारी राखेको छ । पछिल्लो ६ महिनाको तुलनामा जनवरीमा अधिक अस्पतालहरुलाई निशाना बनाइएको थियो ।
यता दक्षिण अफ्रिकाका लागि अमेरिकी राजदूतले उक्त देशले युक्रेन द्वन्द्वमा तटस्थ रहने घोषणा विपरीत रुसलाई हतियारहरू आपूर्ति गरेको आरोप लगाएका छन् । रुबेन ब्रिगेटीले गत डिसेम्बरमा हतियार तथा गोलीगठ्ठाले भरिएको रुसी पानीजहाज केप टाउनमा देखिएको बताए ।
दक्षिण अफ्रिकाका राष्ट्रपति सिरिल रामाफोसाको कार्यालयले आफू उक्त दाबी प्रति दुखी भएको जनाउँदै त्यसलाई पुष्टि गर्ने आधार प्रदान नगरिएको जनाएको छ । दक्षिण अफ्रिकाले युक्रेन अतिक्रमणको मुद्दामा तटस्थता दाबी गर्दै आएको छ ।
तर प्रिटोरियामा बिहीवार आयोजित पत्रकार सम्मेलनमा राजदूत ब्रिगेटीले उक्त द्वन्द्वलाई लिएर दक्षिण अफ्रिकाले व्यक्त गरेको असंलग्नताको नीतिप्रति वासिङटनको चासो रहेको बताए । सिमोन्स टाउन जलसेना शिविर नजिकै गएको डिसेम्बर ६ देखि ८ को बीचमा एउटा मालवाहक पानीजहाज रोकिएको प्रसङ्ग उल्लेख गर्दै उनले रुसतर्फ जानुअघि त्यसमा हातहतियार र गोलीगठ्ठा भरिएकोमा आफू ‘विश्वस्त’ रहेको बताएका छन्।
उनले लगाएको आरोपले दक्षिण अफ्रिकाको सत्तापक्षलाई आश्चर्यमा पारिदिएको छ । उक्त आरोपपछि दक्षिण अफ्रिकाको सरकारले अवकाशप्राप्त न्यायाधीशको नेतृत्वमा एउटा स्वतन्त्र जाँच निकाय गठन गर्ने घोषणा गरेको राष्ट्रपति कार्यालयका प्रवक्ताले बताएका छन् ।
अमेरिकाले केही महिना यता दक्षिण अफ्रिका र रुसबीचको निरन्तरको निकट सम्बन्धलाई आलोचनात्मक रूपले हेर्दै आएको थियो । पछिल्लो दाबी पुष्टि भए त्यसले दक्षिण अफ्रिकाको तटस्थताको नीतिलाई कमजोर तुल्याउने मात्र नभई रुसी कित्तामा अफ्रिकालाई उभ्याउनेछ । दक्षिण अफ्रिका ब्रिक्स गठबन्धनको सदस्य हो जसमा रुससहित विश्वका अग्रणी अर्थतन्त्र चीन, ब्राजिल र भारत समावेश छन् ।
