२५ जेठ, काठमाण्डौ ।
पाकिस्तान र श्रीलंकापछि अर्को देश बंगलादेश अहिले गम्भीर आर्थिक संकटको चपेटामा परेको छ । बंगलादेशको बिजुली र ऊर्जा ऋण अहिले २.५ बिलियन डलर नाघेको छ, जसले थप उर्जा केन्द्रहरू बन्द गर्ने र उर्जा संकट गहिरिने खतरा छ। बंगलादेश विद्युतको ठूलो संकट छ ।
बंगलादेशले नेपालबाट समेत बिजुली आयात गर्ने इच्छा लामो समयदेखि देखाईरहेको छ । यसका लागि नेपालले भारतसँग विद्युत व्यापारको बाटो माग गरिरहेको छ। बंगलादेशले विगत एक वर्षदेखि लगातार आफ्नो ऊर्जा र बिजुलीको बिल तिर्न असफल भएको छ।
बिजुली उत्पादक र आपूर्तिकर्ताहरूले लगातार बंगलादेशलाई उनीहरूको सञ्चालन र आपूर्ति रोक्न चेतावनी दिइरहेका छन्। पायरा पावर प्लान्ट बन्द हुनु भनेको सरकार बिजुली र उर्जा संकटमा परेको प्रमाण हो ।
बंगलादेश उपभोक्ता संघका उर्जा सल्लाहकार एम शमसुल आलमले भनेका छन्, “सरकारले न त बिजुली किन्न सक्छ न त पावर प्लान्टको लागि भुक्तानी गर्न सक्छ। विद्युत् सङ्कटले औद्योगिक गतिविधि लगभग ठप्प भएको छ ।
उनले भने, ‘समस्या भनेको सरकारले संकटको गम्भीरता पनि नबुझेको हो । बंगलादेशका कूल १५४ पावर प्लान्टमध्ये लगभग ६५ प्रतिशत वा १०० पावर प्लान्टहरू मुख्यतया इन्धन अभावका विभिन्न कारणले मंगलबार आंशिक वा पूर्ण रूपमा बन्द भएका थिए।
बंगलादेशको पावर ग्रिड कम्पनीले जारी गरेको तथ्यांकले मंगलबार २१ वटा पावर प्लान्टले आफ्नो ’पूर्ण’ वा ’लगभग पूर्ण’ क्षमता प्रयोग गरेको देखाएको छ। पाकिस्तान जस्तै बंगलादेशको विदेशी मुद्रा सञ्चिति पनि घट्दै गएको छ ।
यस वर्ष मार्चको अन्त्यसम्ममा बंगलादेशको विदेशी मुद्रा सञ्चिति ३१.१४ अर्ब डलर पुगेको थियो, जुन सन् २०१६ को डिसेम्बरयताकै न्यून थियो। बाँकी रहेको स्टकबाट बंगलादेशले पाँच महिनाको मात्रै आयात बिल तिर्न सक्नेछ ।
सञ्चिति बढाउन सरकारले विदेशमा रहेका बंगलादेशीहरुलाई बढीभन्दा बढी रकम स्वदेश पठाउन आग्रह गरेको थियो । यद्यपी बंगलादेशको सञ्चितिमा जम्मा ४.१९ अर्ब डलर बाँकी रहेको छ ।
