५ असार, एजेन्सी ।
टाइटानिक जहाज हेर्नका लागि गएको पनडुब्बी अचानक बेपत्ता भएको छ । सो जहाज बेपत्ता भए पछि उद्धार टोलीले एट्लान्टिक महासागरमा खोजी कार्य जारी राखेको छ । पर्यटकलाई टाइटानिकको भग्नावशेषमा लैजान प्रयोग गरिदै आएको पनडुब्बी एट्लान्टिक महासागरमा बेपत्ता भएकाको खोजी र उद्धार अभियान सुरु गरेको बोस्टन कोस्टगार्डले बीबीसीलाई बताएका छन् ।
बेपत्ता पनडुब्बीमा ५ जना यात्रु सवार रहेको बताइएको छ । बेलायती अर्बपति अन्वेषक हमिस हार्डिङ र प्रख्यात फ्रान्सेली गोताखोर पल–हेनरी नार्गोलेट एटलान्टिक महासागरको गहिराइमा हराइरहेको टाइटानिक पर्यटक पनडुब्बीमा सवार हुन सक्ने आशंका गरिएको छ।
पछिल्ला वर्षहरूमा साना पनडुब्बीहरूवाट टाइटनिक जहाजको भग्नावशेष देखाउनका लागि पर्यटकहरूलाई पन्डुब्बीबाट पठाउन थालिएको थियो । जसमध्येको कम्पनी ओसनगेट एक्सपिडिसनले प्रति यात्रु २ लाख ५० हजार युरो लिँदै उनीहरूलाई टाइटनिक जहाज देखाउँथे । तर, सोमवार देखि सो जहाज बेपत्ता छ ।
सो कम्पनीले एक विज्ञप्तिमार्फत पुष्टि गर्दै भनेको छ, ’हराइरहेको पनडुब्बीको स्वामित्व हाम्रो कम्पनीसँग छ, सो पनडुब्बीमा मानिसहरु छन्, जसको खोजी भइरहेको छ ।’ ‘हामी चालक दललाई सुरक्षित रूपमा फिर्ता ल्याउन सबै विकल्पहरूको खोजी र परिचालन गरिरहेका छौं,’ सो कम्पनीले भनेको छ, ‘हाम्रो सम्पूर्ण फोकस पनडुब्बीमा चालक दलका सदस्यहरू र तिनीहरूका परिवारहरूमा छ।
’ सो कम्पनीले अगाडी भनेको छ, ‘हामी चालक दलका सदस्यहरूको सुरक्षित फिर्ताको दिशामा काम गरिरहेका छौं।’ टाइटानिकको भग्नावशेष क्यानडाको तटबाट ४०० नटिकल माइल टाढा एट्लान्टिक महासागरको मुनि ३,८०० मिटर तल छ। सो पानी जहाज अप्रिल १९१२ मा आफ्नो पहिलो यात्रामा आइसबर्गमा ठोक्किए पछि डुबेको थियो । सो जहाजमा रहेका २२ सय जना मध्ये ६०७ जना मात्र बाँचेका थिए । जुन जहाज १९८५ मा पत्ता लागेको थियो ।
