१४ असार,एजेन्सी ।
साउदी प्रो लिगको क्लब अल हिलालले युरोपबाट अर्का एक खेलाडिलाई पनि भित्र्याएको छ । सेनेगलका गोलकिपर एडोउर्ड मेन्डीलाई अल हिलालले अनुबन्ध गरेको हो । उनी इंग्लिस क्लब चेल्सीबाट अल हिलालमा आवद्ध भएका हुन् । योसँगै ३१ वर्षीय मेन्डी साउदी अरेबियाको क्लबसँग सम्झौता गर्ने चेल्सीका कालिओउ कौलीबाली र एन्गोलो कान्टेपछि तेस्रो खेलाडी बने ।
कौलीबाली अल हिलालमै अनुबन्ध भएका हुन् । कान्टेले अल इत्तिहादसँग सम्झौता गरेका थिए । मेन्डीले चेल्सीबाट सन् २०२०–२१ को च्याम्पियन्स लिग जितेका थिए । चेल्सीलाई च्याम्पियन्स लिगको उपाधि जिताएका मेन्डी उक्त वर्ष ‘यूईएफए गोलकिपर अफ दी सिजन’ र ‘फिफा बेस्ट मेन्स किपर’ चुनिएका थिए ।
उनले चेल्सीबाट १०५ खेल खेल्दा ४९ मा ‘क्लिन सिट’ राखेका छन् । मेन्डी २०२० मा फ्रेन्च क्लब रेनेसबाट चेल्सी आएका थिए । उनी सेनेगलले २०२१ मा अफ्रिका कप अफ नेसन्सको उपाधि जित्दा टिमको महत्त्वपूर्ण सदस्य थिए । “मेन्डी मैदानभित्र र मैदानबाहिर निकै रुचाइएका पात्र हुन् । २०२१ को च्याम्पियन्स लिगमा पु¥याएको महत्त्वपूर्ण योगदानका कारण चेल्सीको इतिहासमा उनको सधैँ स्थान रहिरहनेछ ।
त्यसका लागि र अन्य सबै कुराका लागि क्लब कृतज्ञ छ । आगामी यात्राका लागि शुभकामना एडोउ,” चेल्सीले मेन्डीको बिदाइ सन्देशमा लेखेको छ । मेन्डीले अल हिलालमा चेल्सीका सहकर्मी कौलीबालीसँगै वुल्भ्सका मिडफिल्डर रुबेन नेभेससँग खेल्नेछन् । पछिल्लो समय खेलकुदमा लगानी बढाएको साउदीले फुटबललाई प्रमुख प्राथमिकतामा राखेको छ ।
साउदीले रियाल मड्रिडका फरवार्ड तथा बालन डी‘अर विजेता करिम बेन्जेमालाई पनि भित्र्याएको छ । बेन्जेमालाई लिग च्याम्पियन अल इत्तिहादले अनुबन्ध गरेको थियो । यसबाहेक साउदीका क्लबले टोटनहमका फरवार्ड सन ह्युङ मिन र अर्जेन्टिनी कप्तान लियोनल मेसीलाई पनि अनुबन्धको प्रयास गरेका थिए ।
सनले साउदी क्लबबाट खेल्ने मनासाय नरहेको प्रतिक्रिया दिएका थिए । मेसीले पनि अल हिलालको कीर्तिमानी प्रस्ताव (४०० मिलियन युरो)लाई नकार्दै अमेरिकी क्लब इन्टर मियामीसँग सम्झौता गरेका थिए ।
