२८ असार,एजेन्सी ।
चिनियाँ कम्युनिस्ट पार्टी (सीपीसी) ले प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहालकी पत्नी सीता दाहालको निधनप्रति दुःख व्यक्त गरेको छ । सीपीसीका विदेश विभाग प्रमुख लिउ जियानचाओले शोक मन्तव्य जारी गर्दै दाहालको निधनबाट शोकसन्तप्त परिवारलाई समवेदना प्रकट गरेका हुन् ।
सीता दाहालले माओवादी केन्द्रमा रहेर महत्त्वपूर्ण भूमिका निर्वाह गरेको र चीनको निमन्त्रणामा भएको द्विपक्षीय छलफलमा उनको सहभागिता रहेको भन्दै उनीप्रति श्रद्धाञ्जली व्यक्त गरेको हो ।
यस कठिन घडीमा नेपालको राष्ट्रिय विकासमा नेतृत्व गर्नका लागि प्रधानमन्त्री दाहालको दृढशक्तिको कामना समेत गरेको छ । यसैबीच एक उच्चस्तरीय चिनियाँ प्रतिनिधि टोली नेपाल भ्रमणमा आउन लागेको छ । भोलि अमेरिकी विदेश सहायकमन्त्री डोनाल्ड लु पनि नेपाल भ्रमणमा आउँदै छन् ।
उनी फर्केपछि उच्चस्तरीय चिनियाँ प्रतिनिधि नेपाल भ्रमणमा आउन लागेका छन् । दक्षिण तथा मध्य एसिया हेर्ने अमेरिकी सहायक विदेशमन्त्री डोनाल्ड लु ले एक दिने भ्रमणका क्रममा काठमाडौंमा केही महत्वपूर्ण राजनीतिक भेटघाट गर्ने छन्।
परराष्ट्र मन्त्रालय स्रोतका अनुसार सहायक विदेश मन्त्री लुले प्रधानमन्त्री पुष्पकमल दाहाल ‘प्रचण्ड’ लाई भेटेर उनकी पत्नी सीता दाहालको निधनमा समवेदना व्यक्त गर्ने कार्यक्रम छ। काठमाडौंस्थित अमेरिकी राजदूतावासका अनुसार त्यसबाहेक लुले अमेरिकन चेम्बर अफ कमर्सका प्रतिनिधिसँग छलफल गर्ने र नेपालीहरूलाई विश्वव्यापी रूपमा प्रतिस्पर्धा गर्न सक्षम बनाउने दिशामा अनुपम सिप प्रदान गर्न उनीहरूले गरेका प्रयासबारे बुझ्ने छन्।
लु यसअघि एमसिसी परियोजना संसदबाट पारित हुने क्रममा रहेका बेला नेपाल आएका थिए। लुको भ्रमण सार्वजनिक भएपछि चिनियाँ कम्युनिष्ट पार्टीको उच्चस्तरीय भ्रमण हुन लागेको हो । चिनियाँ कम्युनिष्ट पार्टी (सीपीसी) का पोलिटब्युरो सदस्य युआन जुयान ७ साउनमा नेपाल भ्रमणमा आउँदैछन् । उनी जोङ्किङ शहरको प्रतिनिधिमण्डलको नेतृत्व गरेर आउन लागेका हुन् ।
नेपाल भ्रमणका क्रममा चिनियाँ प्रतिनिधिमण्डलले उच्चस्तरीय राजनीतिक भेटघाट गर्ने कार्यक्रम छ । साथै, नेपाल र चीनको विकास साझेदारीका विषयमा पनि छलफल गर्ने कार्यक्रम छ । उनको भ्रमणको तयारीका लागि अहिले चिनियाँ टोली काठमाडौंमा छ ।
विभिन्न सरोकारवालासँग छलफल गरिरहेको यो टोलीपछि युआन नेतृत्वको टोली काठमाडौं ओर्लिन लागेको हो । प्रधानमन्त्री पुष्पकमल दाहाल प्रचण्डको चीनको भ्रमणको पूर्वसन्ध्यामा युआनको भ्रमण हुन लागेको छ । त्यसैले पनि यो प्रतिनिधिमण्डलको भ्रमणलाई अर्थपूर्ण रूपमा हेरिएको छ ।
पछिल्ला दिनमा अमेरिकी र चिनियाँ प्रतिनिधिहरूको नेपाल भ्रमण निकै बाक्लो भएको छ । चिनियाँ प्रतिनिधिमण्डल काठमाडौंबाट फर्केपछि अमेरिकी सहायता परियोजना (एमसीसी) का प्रमुख कार्यकारी अधिकृत एलिस बी अलब्राइट काठमाडौं आउने कार्यक्रम छ ।
