१४ साउन, काठमाण्डौ ।
सत्तारुढ नेपाली कांग्रेसले सुनकाण्डको जरैदेखि अनुसन्धान नभए आफ्नो पार्टीबाट सरकारमा सहभागी मन्त्रीहरूको राजीनामा माग्ने भएको छ । कांग्रेस सांसद प्रदीप पौडेलले आइतबार बुटवलमा आयोजित एक कार्यक्रममा यस्तो बताएका हुन् । उनले कुनै तल्लो तहको मजदुर वा कर्मचारीलाई दोष दिएर एक÷एक क्वीन्टल सुन काण्डमा सरकार उम्कन नपाउने बताए ।
नेता पौडेलले भने, ‘गहिरोसँग सुनकाण्डको अनुसन्धान नगरी भरियालाई देखाएर टार्ने काम भए हामीले कांग्रेसका मन्त्रीहरूको राजीनामा माग्छौँ । गृहमन्त्रीले पनि राजीनामा दिनुपर्छ ।’ नेता पौडेलले कांग्रेस सरकारमा भए पनि भ्रष्टाचारको विरोधमा सशक्त भएर लाग्ने र दोषीलाई उम्कन नदिने बताए ।
सुन काण्डमा एमालेले उठाएको प्रश्न जायज भएको बताउँदै उनले सदन नै अवरोध गर्ने र मन्त्रीहरूलाई जवाफ दिन नदिने शैली भने फेर्न आग्रह गरे । यसअघि भने काँग्रेस सांसद डा. सुनिल शर्माले माओवादीबाट गृहमन्त्री बनेका नारायणकाजी र काँग्रेसबाट अर्थमन्त्री बनेका प्रकाश शरण महतको राजीनामा मागेका थिए । आफ्नो माग पुरा नभए उनले संसदमै अनसन बस्नेसमेत चेतावनी दिएका थिए ।
यसैबीच माओवादी केन्द्रको पदाधिकारी बैठकमा पनि सुन तस्करी प्रकरणबारे सवाल जवाफ भएको छ । प्रमुख प्रतिपक्षी दल नेकपा एमालेले पार्टीका वरिष्ठ उपाध्यक्षसमेत रहेका उपप्रधान तथा गृहमन्त्री नारायणकाजी श्रेष्ठको राजीनामा माग गरिरहेका बेला माओवादी पदाधिकारी बैठकमा यस विषयले प्रवेश पाएको हो ।
इटाली भ्रमण सकेर स्वदेश फर्किएमा प्रधानमन्त्रीसमेत रहेका पार्टी अध्यक्ष पुष्पकमल दाहालले शनिबार बालुवाटारमा पदाधिकारी बैठक डाकेका थिए । सो बैठकमा सय किलो सुन तस्करी प्रकरणमा प्रधानमन्त्री दाहालले विशेष चासो राखेका थिए । यस विषयमा गृहमन्त्री श्रेष्ठले ब्रिफिङ गरे ।
सुन तस्करी प्रकरणसहित ललिता निवास प्रकरण र नक्कली भुटानी शरणार्थी प्रकरणमा एमाले बढी नै उत्तेजित भएको बैठकको निष्कर्ष रहेको माओवादीका एक उच्च नेताले बताए । ’सरकारले भ्रष्टाचारका फाइल खोल्दा एमालेको बढी नै टाउको दुखेको बैठकको निष्कर्ष रह्यो। रह्यो कुरा सुन तस्करी प्रकरणको, यसमा जोसुकै दोषी देखिए पनि उम्किँदैन ।
मिहिन ढंगले छानबिन भइरहेको छ,’ ती नेताले भने । दाहाल नेतृत्वको सरकारले हालसम्म राम्रो ’पर्फमेन्स’ गरिरहेको बैठकको अर्को निष्कर्ष थियो । प्रचण्डले विमानस्थलमा भने हतारमा राजीनामा मागिएको भन्दै राम्रो संस्कार नभएको प्रतिक्रिया दिएका थिए ।
सुन तस्करी प्रकरणमा अहिलेसम्म करिब २ दर्जन ब्यक्ति पक्राउ परेपनि अझै यसका मालिक भने पक्राउ पर्न सकेका छैनन् । यस प्रकरणमा आज मात्रै ठमेलको होटल भियनाका संचालक दावा छिरिङ पक्राउ परेका छन् । सुनतस्करी प्रकरणमा नै होटल भियनामा राजस्वले छापा हानेको थियो ।
