२७ साउन,काठमाण्डौ ।
सय केजी सुन तस्करी प्रकरणमा पक्राउ परेका व्यवसायी रोहन अदुकियालाई छाडिएको छ । उनलाई विमानस्थल अध्यागमन कार्यालयले आज बिहान छाडेको त्रिभुवन अन्तर्राष्ट्रय विमानस्थलका सुरक्षा प्रमुख डीआईजी अर्जुन चन्द ठकुरीले जानकारी दिए । ‘खोजेका बेला उपस्थित हुने सर्तमा अध्यागमनले उनलाई बिहान ११ बजे रिहा गरेको हो’, उनले भने।
सय किलो सुन प्रकरणमा अनुसन्धानका लागि भनेर ३० वर्षीय रोहनलाई शुक्रबार पक्राउ गरिएको थियो । अदुकियालाई पक्राउ गर्न राजस्व अनुसन्धान विभागले अध्यागमन विभागमा पत्र पठाएको थियो । राजस्वको पत्रअनुसार अध्यागमनले अदुकियाको राहदानी कालोसूचीमा राखेर निगरानी गरिरहेको थियो ।
उक्त प्रकरण अनुसन्धान गरिरहेका राजस्व अनुसन्धान विभाग र नेपाल प्रहरीको केन्द्रीय अनुसन्धान ब्युरो (सीआईबी) दुवैले बुझ्न नमानेपछि उनलाई अध्यागमनले छाडिदिएको हो । सुन तस्करी प्रकरणमा आफूहरूको खोजीको सूचीमा नरहेको भन्दै राजस्व र सीआईबी दुवैले उनलाई जिम्मा लिन अस्वीकार गरेका थिए ।
त्यसपछि विमानस्थल अध्यागमन कार्यालयमै लगिएका रोहनलाई आज बिहान रिहा गरिएको हो । २२ वर्षीय रोहन अदुकिया एयर इन्डिगो मार्फत शुक्रबार नेपाल आएका थिए । उनलाई त्रिभुवन अन्तर्राष्ट्रिय विमानस्थलबाट अध्यागमन कार्यालयले दिउसो ३.२१ बजे पक्राउ गरेको हो । उनले (श ६३९६४२) नम्वरको भारतिय पासपोर्ट प्रयोग गरेका थिए ।
नेपालबाट भारततर्फ तस्करी हुन लागेको सुन विभागको टोलीले साउन २ गते समाते पछि साउन ५ गते बिहान नेपाल वायुसेवा निगमको उडान नम्बर २०५ बाट अदुकिया भारततर्फ लागेका थिए । रोहन व्यापारी राजेश अदुकियाका छोरा हुन् । भारितय नागरिक भए पनि अदुकिया नेपालमै हुर्केका हुन् ।
एक क्विन्टल सुन तस्करी प्रकरणमा राजस्व अनुसन्धान विभागको सर्वाधिक खोजीको सूचीमा रहेका पात्र हुन् अदुकिया । ङकङबाट काठमाडौं आएको एक क्विन्टल सुन बरामद हुनु र व्यापारी अदुकिया पछिल्ला नौ महिनामा १४ पटक नेपाल–हङकङ ओहोरदोहोर गरेको भेटिएपछि सुन तस्करी प्रकरणमा उनको संलग्नता हुनसक्ने आशंका गरिएको छ ।
हङकङको टुर शंकास्पद देखिए पछि उनको घरमा छापा मारेको भए पनि अदुकियाले भने देश छाडिसेकका थिए । उनका बाबु गोर्खा विकास बैंकमा भएका काण्डपछि शेयर बजारको ठूलो खेलाडीबाट विस्थापित भएका थिए । त्यसपछि उनी सुनको अवैद्य धन्दामा लागेको हुनसक्ने आशंका गरिएको छ।
गोर्खा विकास मार्फत सर्वसाधारणको करौडौं निक्षेप डुबाउने खेलमा पनि उनका बाबु राजेश अदुकियाको मुख्य भूमिका रहेको थियो । गोर्खा बैंक प्रकरणमा उनी पक्राउ परेर पुनरावेदन अदालतले अन्तरिम आदेश दिए पछि अदुकिया छुटेका थिए ।
उनी विरुद्ध बैंकिङ कसुरको मुद्दा भने कायमै रहेको छ । पछि उनले वेल्थ एक्सचेन्ज नामको कमोडिटी मार्केटिङ कम्पनी समेत खोलेका थिए ।यस्तै शुक्रबार नै पक्राउ परेका दुई चिनियाँ नागरिकलाई रिहा पनि एकसाथ आज गरिएको छ ।
हिजो पक्राउ परेका ली जियालिङ र लिउ फुयान नामका दुई चिनियाँ नागरिकलाई घटनामा संलग्नता नदेखिएको भन्दै नेपाल प्रहरीको केन्द्रीय अनुसन्धान ब्युरो ९सीआईबी० ले आजै बिहान रिहा गरेको हो ।
