२० भदौ, एजेन्सी ।
५५औं एशियन शारीरिक सुगठन तथा फिजिक्स स्पोर्टस च्याम्पियनसिपमा मिष्टर एशियाको उपाधि भारतका सराभनन मनीले जितेका छन् । आफ्ना १० प्रतिस्पर्धीलाई पछि पार्दै मनीले उपाधि जितेका हुन् । शारीरिक सुगठनतर्फको विभिन्न १० तौलसमूहका विजयीहरुबीच भएको मिष्टर एशियाको विजेता मनीले ट्रफी पाए ।
उनी ९० केजी तौलसमूमा विजयी हुँदै ओभर अल राउण्डमा प्रवेश गरेका थिए । प्रतियोगिता एशियन शारीरिक सुगठन तथा फिजिक्स स्पोर्टस फेडेरेसनको आयोजना र नेपाल शारीरिक सुगठन तथा फिटनेस महासंघको व्यवस्थापनमा भएको हो । प्रतियोगितामा पुरुषतर्फ नेपालले कुल दुई सय ६० अंकसहित टिम च्याम्पियनसिपमा तेस्रो स्थान हासिल ग¥यो ।
पुरुषतर्फ भारत सात सय ९५ अंकसहित पहिलो र थाइल्याण्ड पाँच सय ९० अंकसहित दोस्रो भए । महिलातर्फ थाइल्याण्ड टिम च्याम्पियन बन्यो । भियतनाम दोस्रो र हङ्ककङ तेस्रो भए । बुधबार सम्पन्न पुरुष एथलेट फिजिक १८२ सेमीमा नेपालका विप्लभ कार्कीले कांस्य पदक प्राप्त गरे । उक्त स्पर्धामा भारतका रामा सोमाशेखर पहिलो र भुटानका टान्डिन वाङ्चेन दोस्रो भए ।
च्याम्पियनसिपमा नेपालले तीन स्वर्ण, ६ रजत र पाँच कांस्य पदक प्राप्त ग¥यो । विशाल पौडेलले जुनियर शारीरिक सुगठन, सनम मुलगुठीले स्विम सुट विधा र रनजी श्रेष्ठले ५५ केजीमा स्वर्ण जिते । सुरेश दुवालले ५५ केजी, अशिम बाबु गरुङले ६० केजी, मनोज सुवेदीले ६५ केजी, ललित धिमालले ७५ केजी र राजु राईले फिटनेश फिजिक तथा तारा खैजुले मोडल फिजिक्समा रजत पदक प्राप्त गरे ।
यसैगरी कमल भण्डारीले ६० केजी, कृष्णप्रसाद श्रेष्ठले ८० केजी, रञ्जित लामाले फिटनेश फिजिक्स, बिप्लभ कार्कीले एथलेटिक्स फिजिक तथा निहालमान जोशीले एथलेटिक्स फिजिकमा कांस्य पदक प्राप्त गरेका थिए । च्याम्पियनसिपमा १७ राष्ट्रका एक सय ६८ पुरुष र ६८ महिला गरी कुल दुई सय ३६ जना खेलाडीले विभिन्न ४५ विधामा प्रतिस्पर्धा गरेका थिए ।
