२९ भदौ, एजेन्सी ।
उत्तरी चीनको हेबेई प्रान्तको शिङसान फलाम खानीमा रिमोट कन्ट्रोल प्रविधि लागू भएको छ । अब फलाम खानीका प्राविधिकहरुले टाढैबाट भूमिगत खानी गतिविधिहरुमाथि निगरानी र नियन्त्रण गर्नसक्ने भएका हुन् । प्राविधिकहरुले सो फलाम खानीमा धेरै मात्रामा फलाम रहेको अनुमान गरेका छन् ।
यो रिमोट कन्ट्रोल प्रविधिबाट भूमिगत काम गर्न सहयोग पुग्ने शिङसान फलाम खानीका उपनिर्देशक युआन वेइले सिन्ह्वालाई बताएका छन् । उनले आफूलाई सुरक्षित राख्नका लागि यो रिमोट प्रविधि राम्रो हुने विश्वास लिएका छन् । उनले फाइभ जी प्रविधि र उपकरणको सुधारको लागि धन्यवाद समेत दिएका छन् ।
चीनमा फलाम खानीमा विष्फोट भएर अहिलेसम्म दजनौं मजदुरले ज्यान गुमाई सकेका छन् । ५ वर्षअघि मात्रै चीनको उत्तरपूर्वी प्रान्त लियाओनिङमा रहेको एउटा फलाम खानी विष्फोट हुँदा कम्तीमा ११ जनाको मृत्यु भएको थियो भने खानीमा फसेका २ दर्जनभन्दा बढी श्रमिकको उद्दार गरिएको थियो ।
विष्फोटका घटनापछि चीन सरकारले खानी उत्खन्नको सुरक्षालाई ब्यवस्थित गर्दै ल्याएको छ । चीन पछिल्लो समय आधुनिक प्रविधिको विकास र प्रयोगमा अग्रणी मुलुक भित्र पर्दछ । आर्टिभिसियल प्रविधिबाट हतियार बनाउने देखि सेनालाई सुसज्जित बनाउने कुरामा चीन अगाडि रहेको छ ।
प्रविधिकै उपयोग गरेर चिकित्सकीय तथा अन्तरिक्ष मिसनमा समेत छोटो समयमा चीनले अनपेक्षित उपलब्धि हासिल गरेको छ । अन्तरिक्षमा आफ्नो छुट्टै अन्तरिक्ष स्टेशन बनाई रहेको चीनले चन्द्रमामा मानिस पठाउने अभियानमा जुटेको छ ।
