६ असोज, काठमाण्डौ ।
आजबाट १९ औं एसियाली खेलकुदको औपचारिक सुरुवात भएको छ । चीनको उत्तर दक्षिणी सहर हाङझाउमा एक भव्य समारोहबीच चीनका राष्ट्रपति सी जिनफिङले प्रतियोगिताको उद्घाटन गरेका छन् । एसियाडका खेलहरु २ गते नै सुरु भए पनि आज औपचारिक उद्घाटन भएको हो । उद्घाटन समारोहमा प्रधानमन्त्री प्रचण्ड पनि सहभागी भएका छन् ।
एसियन गेम्समा नेपालका २९ खेलका २ सय ५३ खेलाडीले नेपालको चुनौती पेस गर्दै छन् । एसियन गेम्समा नेपालबाट सबैभन्दा धेरै खेलाडी पहिलोपटक सहभागी हुन लागेका हुन् । उद्घाटन समारोहअघि आयोजित स्वागत भोजमा चिनियाँ राष्ट्रपति सी चिनफिङले खेलकुदमार्फत शान्ति, ऐक्यबद्धता र समावेशिता प्रवर्द्धन गर्न आह्वान गरेका छन् ।
ऐक्यबद्धताका सन्दर्भमा राष्ट्रपति सीले भने, ‘साझा भविष्य भएको समुदायको सदस्यका रूपमा एसियाली राष्ट्रहरूले असल छिमेकी र पारस्परिक हितलाई पालना गर्नुपर्छ, शीतयुद्धको मानसिकता र शिविरमा आधारित टकरावलाई अस्वीकार गर्नुपर्छ र एसियालाई विश्व शान्तिको वाहक बनाउनुपर्छ । सी र प्रचण्डबीच आजै द्विपक्षीय भेटवार्ता भएको छ ।
प्रधानमन्त्री प्रचण्ड चीनमा व्यस्त रहेकाबेला यता भारतले भने नेपालका प्रधानमन्त्री पुष्पकमल दाहाल प्रचण्डको भारत भ्रमणपछि भएका उपलब्धिहरू सार्वजनिक गरेको छ । काठमाडौंस्थित भारतीय राजदूतावासले सामाजिक सञ्जाल एक्समार्फत शनिबार दिउँसो विकास साझेदारीले थप गति लिएको उल्लेख गर्दै विभिन्न महत्त्वपूर्ण आयोजनाहरूको बारेमा उल्लेख गरेको हो ।
विशेषगरी प्रधानमन्त्रीको भ्रमणका क्रममा दश वर्षमा भारततर्फको विद्युत् निर्यात क्षमतालाई १० हजार मेगावाट पु¥याउन प्रयास गर्ने प्रतिवद्धतालाई यथार्थमा बदल्ने प्रयास भएको राजदूतावासले जनाएको छ । त्यस्तै, १३२ केभी टनकपुर– महेन्द्रनगर ट्रान्समिसन लाइनमार्फत विद्युत थप भएको उल्लेख गरिएको छ ।
प्रधानमन्त्री प्रचण्ड र समकक्षी नरेन्द्र मोदीबीच भएको भेटघाटका तस्बिर सार्वजनिक गर्दै राजदूतावासले भनेको छ, ‘विकास सहयोग सम्बन्ध सुदृढ र परिवर्तन गर्दै अघि बढ्छौं।’ राजदूतावासले कुर्था–बिजलापुर रेल, विसं २०७२ मा गएको महाभूकम्पपछि ललितपुरको नापिचन्द्र महाविहार पुननिर्माण, बुढानिलकण्ठ धर्मशाला पुननिर्माण लगायतका विषयहरूलाई पनि उलब्धिका रुपमा सार्वजनिक गरेको छ । प्रधानमन्त्री प्रचण्ड गत जेठ १७ देखि २० सम्म भारत भ्रमण गरेका थिए । पदभार ग्रहण परेपछि प्रचण्डले पहिलो भ्रमण नै भारत गरेका थिए ।
