७ असोज, एजेन्सी ।
सामाजिक संजालमा फेसबुकमा अब प्रयोगकर्ताहरुले एकै अकाउन्टबाट चारवटासम्म प्रोफाइल बनाउन सक्ने भएका छन् । मेटाले फेसबुकका लागि विश्वभर नै नयाँ फिचर सार्वजनिक गरेको छ। फेसबुक प्रयोगकर्ताले अब आफ्नो अकाउन्टमा चारवटासम्म प्रोफाइल बनाउन सक्ने फिचर मेटाले सार्वजनिक गरेको हो ।
हाल फेसबुकमा मल्टिपल अर्थात् एउटा युजरनेमबाट एउटा मात्रै खाता बनाउन वा खोल्न मिल्छ। यो फिचर सुरू भएसँगै अब एउटै युजरनेमबाट व्यक्तिले चारवटासम्म खाता खोल्न सक्नेछन् । केही व्यक्तिहरू आफ्नो व्यावसायिक र व्यक्तिगत जीवन फरक–फरक राख्न रुचाउँछन् । त्यस्ता व्यक्तिहरू फेसबुकमा सोही तरिकाले आफ्नो प्रोफाइल बनाउन खोज्छन्।
तर अहिले फेसबुकमा त्यो सम्भव छैन। नयाँ फिचर आएसँगै यस्तो सम्भव हुने बताइएको छ । नयाँ फिचरबारे फेसबुकले भनेको छ, ’हामीले प्रयोगकर्ताहरूबाट उनीहरूको साथी, भिन्न समूह, र आफूले चासो राख्ने व्यक्तिहरूलाई छुट्टाछुट्टै ग्रुपमा राख्न सक्यौं भने उनीहरूलाई सान्दर्भिक लाग्ने श्रोताहरूसँग संलग्न हुन स्वतन्त्र महसुस हुन्छ भन्ने सुन्यौं।
यही कुरालाई पनि ध्यानमा राख्दै नयाँ फिचर सार्वजनिक गरेका छौं। एउटै व्यक्तिले धेरै व्यक्तिगत प्रोफाइलहरू बनाउँदा विभिन्न मानिसहरूको समूहलाई संगठित गर्न मद्दत मिल्नेछ।’ मुख्य अकाउन्टले अन्य प्रोफाइलबारे कुनै जानकारी दिँदैन । ती प्रोफाइलहरूको फरक नाम, आफ्नै मेसेज, छुट्टै प्राइभेसी सेटिङ र नोटिफिकेसन पनि अलग्गै हुने मेटाको भनाइ छ ।
यहीकारण ती फरक–फरक प्रोफाइल एक अर्काभन्दा भिन्न हुने र लगआउट वा लगइन नगरी सजिलै प्रोफाइल स्विच गर्न सकिने मेटाले उल्लेख गरेको छ । तर त्यसरी बनाइने प्रोफाइलहरूमा डेटिङ, मार्केटप्लेस, प्रोफेसनल मोड र पेमेन्ट जस्ता फिचर हुने छैनन् । चाँडै नै त्यस्ता प्रोफाइलमा मेसेन्जर सपोर्टको सुविधा दिने मेटाले उल्लेख गरेको छ ।
मेटाले सो घोषणा शुक्रबार अर्थात् सेप्टेम्बर २१ मा मात्रै गरेको हो। यो फिचर विश्वव्यापी रूपमा नै सुरू भएको जनाइएको छ। यद्यपि यो फिचर सबै स्थानबाट प्रयोग गर्नका लागि केही समय लाग्ने समेत जानकारी गराइएको छ ।
यो सुविधा ल्याउन मेटाले गत वर्षदेखि काम गरिरहेको थियो । रुचि अनुसार फरक–फरक अकाउन्ट प्रयोग गर्ने प्रयोगकर्ताका लागि यो फिचर उपयोगी हुने देखिन्छ । पछिल्लो तथ्याङ अनुशार फेसबुकका मासिक सक्रिय प्रयोगकर्ता विश्वभर तीन अर्बभन्दा बढी छन्।
