२४ मंसिर, एजेन्सी ।
पछिल्लो पटक चीनमा स्वासप्रस्वास सम्बन्धि संक्रमण फैलिएको खबरहरु आइरहँदा उता संयुक्त अधिराज्य बेलायतमा पनि स्वास्थ्य विशेषज्ञहरुले एक तिव्र संक्रामक रोगका लागि अलर्ट जारी गरेका छन् । साथै मानिसहरुलाई सतर्क रहन पनि अपिल गरेका छन् ।
चिकित्सकहरुका अनुसार यो रोगको नाम ’पर्टुसिस वा वूपिंग कफ’ हो । यो रोगमा मानिसहरुलाई १०० दिनसम्म खोकी लाग्ने समस्या देखिएको छ । शुरुआतमा सामान्य रुघाखोकीको लक्षण देखिने तर पछि लामो समयसम्म खोकीको समस्या हुने गरेको छ ।
जुन तीन महिना वा झण्डै १ सय दिनसम्म रहने गरेको छ । बेलायतको हेल्थ सिक्योरिटी एजेन्सीले भनेको छ कि जुलाईदेखि नोभेम्बरका बीच देशमा ७१६ पर्टुसिसका संक्रमितहरु फेला परेका छन् । यसमा छातीमा संक्रमण हुन्छ ।
स्वास्थ्य विशेषज्ञहरुका अनुसार कोरोना महामारीका बेला यो रोगका केशहरुको संख्या घटेको थियो किनभने त्यतिबेला सामाजिक दुरीको पालना गरिएको थियो र लकडाउन पनि गरिएको थियो । जसका कारण संक्रमण फैलिन पाएन ।
तर अहिले कोरोना महामारीको प्रकोप सकिएपछि पर्टुसिसको संक्रमण फेरि बढ्न थालेको हो । पर्टुसिस भएकाहरुमा छाती र स्वास नलिमा संक्रमण हुन्छ । ५० को दशकमा यो संक्रमणका कारण ठूलो संख्यामा बालबालिकाहरुको मृत्यु भएको थियो । तर १९९० मा यसको भ्याक्सिन आएपछि संक्रमण घटेको थियो ।
अहिले फेरि बालबालिकाहरुका साथै वयस्कहरुमा पनि यो रोगका विरामीहरुको संख्या बढ्न थालेको छ । १०० दिनसम्म खोकी लाग्दा मानिसहरुमा त्यसको असरस्वरुप हर्निया, करङ्गहरुमा दुखाई, कानमा संक्रमण र पिसावसम्बन्धि समस्या जस्ता थप समस्याहरु पनि निम्त्याएको पाइन्छ । यद्यपी यो रोगका लागि भ्याक्सिन उपलब्ध छ र यो रोग निको पनि हुन्छ ।
