१९ पुष, एजेन्सी ।
अमेरिकी राज्य नेभाडाको अदालतमा सुनुवाइका क्रममा एक महिला न्यायाधीशमाथि फैसला सुनाउने क्रममा एक अभियुक्त पुरुषले आक्रमण गरेका छन् । यो पूरै घटना क्यामेराले कैद भएपछि अहिले यसको भिडियो भाइरल भएको छ । यस आक्रमणपछि क्लार्क काउन्टी जिल्ला न्यायाधीश मेरी के होल्टहाउस कुर्सीबाट खसेर घाइते भएकी छन् ।
न्यायाधीश मेरीलाई सामान्य चोट लागेको थियो ।आक्रमण गर्ने व्यक्तिलाई अदालत कोठामा उपस्थित मानिसहरूले नियन्त्रणमा लिएर कुटपिट गरेका थिए। उक्त घटनाको भिडियोमा आक्रमणकारी र अदालतका सुरक्षाकर्मीबीच घम्साघम्सी भएको देखिन्छ । झडपमा एक अदालत सुरक्षाकर्मी घाइते भएको बताइएको छ ।
यी सुरक्षाकर्मीले न्यायाधीशलाई बचाएका थिए । सुरक्षाकर्मीलाई उपचारका लागि अस्पताल भर्ना गरिएको छ । यो हमला लस भेगासको क्षेत्रीय अदालत केन्द्रमा बिहान करिब ११ बजे भएको बताइएको छ । आक्रमणकारीको पहिचान देओब्रा डेलोन रेडडेनको रूपमा गरिएको छ ।
पक्राउपछि उनलाई क्लार्क काउन्टी डिटेन्सन सेन्टरमा राखिएको थियो। अहिले महिला न्यायाधीशमाथि हमला गरेपछि उनीविरुद्ध धेरै नयाँ मुद्दा दर्ता भएका छन् । प्रमुख काउन्टी जिल्ला न्यायधिवक्ता रिचर्ड स्कोले ’यो एकदमै चाँडो भएको र के गर्ने भनेर तुरुन्तै बुझ्न नसकिएको प्रतिक्रिया दिएको सीएनएनले उल्लेख गरेको छ ।
डेलोन यसअघि बेसबल ब्याटले आक्रमण गरेको आरोपमा पक्राउ परेका थिए। महिला न्यायाधीश निकै अनुभवी छिन् र उनीसँग २७ वर्षको न्यायिक अनुभव रहेको बताइएको छ ।
