२९ पुष,काठमाण्डौ ।
एएफसी एसियन कपमा उज्वेकिस्तान र सिरियाले बराबरी खेलेका छन् । समूह ‘बी’ रहेका दुई टोलीले शनिबार गोलरहित बराबरी खेल्दै अंक बाँडेका हुन् । त्यसअघि शनिबार नै समूहको अर्को खेलमा अस्ट्रेलियाले भारतलाई २–० ले हराएको थियो । अष्ट्रेलिया उपाधि दाबेदार मध्येको एक टोली हो ।
पहिलो हाफमा गोलरहित बराबरी खेले पनि भारतले दोस्रो हाफमा सम्हालिएको प्रदर्शन गर्न सकेन । खेलको ५०औँ मिनेटमा ज्याक्सन इर्भानेको गोलबाट अष्ट्रेलियाले अग्रता बनायो । ७३औँ मिनेटमा जोर्डन बोसले अर्को गोल गरेपछि अष्ट्रेलियाले अग्रता दोब्बर बनायो ।
यससंगै अस्ट्रेलियाको ३, उज्वेकिस्तान र सिरियाको १ अंक तथा भारत अंक विहिन छ । समूह ‘ए’ को शनिबार भएको अर्को खेलमा चीन र ताजाकिस्तानले पनि गोलरहित बराबरी खेलेका थिए । त्यो समूहमा कतारले उद्घाटन खेलमा लेवनानलाई ३–०ले हराएको थियो ।
कतारका लागि अक्रम अफिफले २ र अर्को गोल अल्मोएज अलिले गरेका थिए । एसियन कपमा आज जापान र भियतनामबीच साँझ ५ः१५ बजे, युएई र हङकङबीच साँझ ८ः१५ बजे तथा इरान र प्यालेस्टाइनबीच राति ११ः१५ बजे खेल हुनेछ ।
फिफा विश्वकप आयोजना गरेको डेढ वर्षमै कतारले एसियन कपको १८ औँ संस्करण आयोजना गरेको हो । प्रतियोगितामा एसियाका २४ देश प्रतिस्पर्धामा छन् । २४ देशलाई ६ समूहमा विभाजन गरिएको छ ।
