१३ माघ,काठमाण्डौ ।
के तपाइँले आफ्ना बालबालिकाहरुलाई कटन क्यान्डी खुवाउँने गर्नु भएको छ । यदी छ र तपाइँ काठमाडौंमा हुनुहुनु भने ख्याल गर्नुहोला । कटन क्यान्डी बेच्दा वा किन्दा तपाइँलाई २ लाख रुपैयासम्म जरिवाना हुनसक्छ ।
कटन क्यान्डीलाई खाद्य प्रविधि तथा गुण नियन्त्रण विभागले अखाद्य बताएको छ । विभागले परीक्षणपछि गुलावी रंगको कटन क्याण्डीलाई अखाद्य मानेको हो ।
सोहि परीक्षणको आधारमा काठमाडौं महानगरपालिकाले पनि उक्त कटन क्याण्डीको उत्पादन, बिक्री बितरण र प्रयोगमा बन्धेज लगाएको छ । महानगरपालिकाको कृषि तथा पशुपंक्षी विभागले गुणस्तर नभएका खानेकुरा बेचबिखन गरेको पाइएमा बजार व्यवस्थापन तथा अनुगमन ऐन २०७७ को दफा ३० ले दिएको अधिकार प्रयोग गरी ५ हजार रुपैयाँदेखि २ लाख रुपैयाँसम्म जरिवाना गराउने सूचना जारी गरेको छ ।
महानगरपालिकाकी उपप्रमुख सुनिता डंगोलले बालबालिकाका लागि खानेकुरा किन्दा गुणस्तर हेरेर मात्र किन्न आग्रह गर्दै कटन क्याण्डी उपभोग नगर्न आग्रह गरेकी छन् ।
बालबालिकालाई लक्षित खुला रुपमा बेचिने कटन क्यान्डी (मिठाइ) महानगरपालिकाको वडा नं. ७ चावहिल चोकबाट नमूना संकलन गरेर महानगरपालिकाको कृषि तथा पशुपन्छी विभागले पुस २९ गते राष्ट्रिय खाद्य तथा दाना रिफरेन्स प्रयोगशालामा परीक्षणका लागि पठाएको थियो ।
यसरी पठाइएको नमूनामा ‘रोडामीन बी’ नामक अखाद्य रङ्ग मिसाइएको प्रतिवेदन प्राप्त भएपछि उपप्रमुख डंगोलले बजार अनुगमन टोलीलाई यस्ता बस्तु बेचिने ठाउँहरुमा तत्काल अनुगमन गर्न निर्देशन दिँदै अभिभावकहरुलाई खानेकुरा किन्दा गुणस्तर हेरेर मात्र किन्न आग्रह गरेकी छन् ।
