१९ माघ, काठमाण्डौ ।
नेपालमा हाल पश्चिमी वायुको आंशिक प्रभाव रहेको छ । उक्त मौसमी प्रणाली कमजोर रहेकाले अबको दुई दिन मौसम सामान्यतया सफा रहने छ । तर आइतबारदेखि देशको पश्चिम भेगबाट पश्चिमी वायुको सक्रियता बढ्ने भएकाले केही दिन मौसममा गडबडी हुने जल तथा मौसम विज्ञान विभाग मौसम पूर्वानुमान महाशाखाले जनाएको छ ।
मौमसविद् गोविन्दकुमार झाका अनुसार आज र भोलि मौसममा सुधार रहे पनि आइतबारदेखि देशको मौसममा गडबडी हुनेछ । आइतबारदेखि पानी पार्न सक्ने अर्को प्रणाली भित्रिने सम्भावना रहेको छ । बिहीबार पश्चिमी वायुसँगै आएको पश्चिमी न्यून चापीय प्रणालीका कारण देशका अधिकांश स्थानमा बदली हुनाका साथै उच्च पहाडी तथा हिमाली भू–भागमा हल्का हिमपात भएको छ ।
यस्तै सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशका केही भू–भागमा तथा बागमती र कोशी प्रदेशका पहाडी भूभागका थोरै स्थानमा फाटफुटदेखि हल्का वर्षा भएको थियो । हिजो दिनभर वर्षा र हिमपात भएको ठाउँमा आज चिसो बढेको छ । आज पनि कोशी र गण्डकी प्रदेशका पहाडी भू–भागका एक–दुई स्थानमा फाटफुटदेखि हल्का वर्षाको सम्भावना छ ।
कोशी प्रदेशको उच्च पहाडी तथा हिमाली भू–भागका थोरै स्थान तथा बाँकी उच्च पहाडी तथा हिमाली भेगका केही स्थानमा हल्का हिमपातको सम्भावना छ । मौसमविद् झाका अनुसार तराईका धेरैजसो ठाउँमा हुस्सु र कुहिरो हटेको छ । थोरै ठाउँमा मात्रै बिहान हुस्सु र कुहिरो लागेको महाशाखाले जनाएको छ ।
