१५ चैत , काठमाण्डौ।
प्रधानमन्त्री पुष्पकमल दाहाल ’प्रचण्ड’ र प्रमुख प्रतिपक्षी नेपाली कांग्रेसका सभापति शेरबहादुर देउवाबीच आज पनि भेटवार्ता भएको छ । आज बिहान बालुवाटारमा दुई शीर्ष नेताबीच भेटवार्ता भएको हो । उनीहरूबीच करिब एक घण्टा कुराकानी भएको थियो । संसदलाई नियमित चलाउने र विचाराधीन कानुनहरू पारित गर्ने विषयमा छलफल गर्न प्रधानमन्त्री प्रचण्डले सभापति देउवालाई बोलाएको प्रधानमन्त्रीका प्रेस सल्लाहकार गोविन्द आचार्यले जानकारी दिए ।
पछिल्लो पटक देउवा र प्रचण्डबीचको भेटवार्ता बाक्लिएको छ । सहकार्य तोडिएपछि पहिलो पटक मंगलबार राति उनीहरूबीच भेटवार्ता भएको थियो । मंगलबार राति दुई नेताबीच एक घण्टा छलफल भएको थियो । त्यसको ४८ घण्टा नबित्दै देउवा र प्रचण्डबीच फेरि आज बिहान भेटवार्ता भएको हो । आसन्न उपनिर्वाचमा साझा उम्मेदवारका सन्दर्भमा सत्तारुढ दलहरू एक मत हुन नसकेको बेला दुई नेताबीचको भेटलाई अर्थपूर्ण रुपमा हेरिएको छ ।
यद्यपि प्रधानमन्त्रीको सचिवालय भने संसदमा विचाराधिन विधेयक र संसदको अवरोध हटाउनेलगायतका विषयमा छलफल भएको बताउँछ । भेटमा संसदमा जारी गतिरोध अन्त्य गर्नेलगायत विषयमा छलफल भएको प्रधानमन्त्रीको सचिवालयले जनाएको छ । कांग्रेसले गृहमन्त्री रवि लामिछाने सहकारी ठगी प्रकरणमा संलग्न रहेको आरोप लागेको भन्दै सो सम्बन्धमा संसदीय छानबिन समिति गठन गर्न माग गरी संसदमा अवरोध गर्दै आएको छ ।
यस्तै सङ्क्रमणकालीन न्याय सम्बन्धी विधेयक पारित गरेर लैजाने विषयमा छलफल भएको प्रधानमन्त्रीको सचिवालयले जनाएको छ । बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन २०७१ लाई संशोधन गर्न बनेको विधेयक संसदमा विचाराधीन अवस्थामा छ । गत फागुन २१ मा कांग्रेससँग सहकार्य तोडेर एमालसँग गठबन्धन गरेका प्रधानमन्त्री प्रचण्डले आफूहरुलाई धोका दिएको कांग्रेसको आरोप छ ।
आजको भेटमा राष्ट्रिय मुद्दाहरूमा सबै दल मिलेर अघि बढ्नुपर्ने प्रधानमन्त्री प्रचण्डको प्रस्तावमा देउवा पनि सकारात्मक भएको प्रधानमन्त्रीका प्रेस सल्लाहकार आचार्यले बताए । उनले भने, ‘राष्ट्रिय मुद्दाहरूमा सत्तापक्ष र प्रतिपक्ष नराखौं, मिलेर अघि बढौं भन्ने प्रधानमन्त्री प्रचण्डको आग्रह थियो ।
खासगरी अदालतबाट समेत आदेश आइसकेको सन्दर्भमा टीआरसीलाई अघि बढाउने, विधेयक अधिवेशनमा त्यति धेरै विधेयकहरू अघि नबढेकाले अब बढाऔं भन्ने लगायतका मुद्दामा प्रधानमन्त्रीले आग्रह गर्नुभयो र त्यसमा देउवाबाट पनि सकारात्मक प्रतिक्रिया आएको छ ।’ कांग्रेस सभापति शेरबहादुर देउवाका स्वकीय सचिव भानु देउवाले भेटवार्ताको क्रममा संवैधानिक परिषद् बैठकको विषयमा छलफल भएको बताए ।
‘१८ गते प्रधानमन्त्रीले संवैधानिक परिषद्को बैठक बोलाउनु भएको छ । त्यहीबारेमा कुरा भएको हो,’ देउवाले भने । प्रमुख प्रतिपक्ष दल कांग्रेसले सहकारी संस्थाको रकम हिनामिना प्रकरणमा गृहमन्त्री रवि लामिछानेको समेत नाम मुछिएको विषयमा संसद्मा प्रश्न उठाउँदै आएको छ । आजको भेटमा त्यो विषयमा भने छलफल नभएको स्वकीय सचिव देउवाले बताए ।
