२२ चैत ,काठमाण्डौ।
गएराती मदिराले मातेर सार्वजनिक स्थानमा होहल्ला गरेको अवस्थामा पक्राउ परेका गायक राजेश पायल राई रिहा भएका छन् । राजेश पायल राईसहित तीन जनालाई गएराती मदन भण्डारी कलेज अगाडिबाट पक्राउ गरी प्रहरी वृत्त नयाँबानेश्वरमा राखिएको थियो । काठमाडौँ प्रहरी परिसरका प्रवक्ता एसपी नवराज अधिकारीले भने, ‘उनीहरू तीनै जनालाई गएराति नियन्त्रणमा लिई नयाँ बानेश्वर प्रहरी वृत्तमा राखिएको थियो’, ।
प्रहरी परिसरका अनुसार उनीहरूलाई अनामनगरस्थित मदनभण्डारी कलेजनजिकैबाट पक्राउ गरिएको हो । अन्यको नाम भने प्रहरीले खुलाएन । मदिरा पिएर होहल्ला गरेको भन्दै स्थानीयले खबर गरेपछि प्रहरीको टोली घटनास्थल पुगेको थियो । त्यस क्रममा गायक राईलगायतले उल्टै प्रहरीलाई गालीगलोज गरेपछि नियन्त्रणमा लिएको प्रहरीको भनाइ छ ।
प्रहरीका अनुसार पुलहाउसअगाडि उनीहरूको एकआपसमा विवाद भएको थियो । प्रहरीले सम्झाउन खोज्दा उल्टै प्रहरीलाई थर्काएकाले पक्राउ उनीहरूलाई पक्राउ गरिएको हो । ‘पुलहाउसअगाडि होहल्ला गरेपछि बानेश्वर प्रहरीले रातिको २ बजे राजेशपायल लगायतलाई पक्राउ गरेको हो । गएराति काठमाडौं उपत्यकाभरबाट १७२ जनालाई प्रहरीले नियन्त्रणमा लिएको थियो ।
उनीहरुमध्ये धेरैजसोलाई आफन्तको जिम्मा लगाइएको छ । गायक राईलाई पनि आफन्तको जिम्मा लगाइएको हो । गायक राई यसअघि पनि विभिन्न विवादमा पर्दै आएका छन् । दुई वर्ष पहिले राई माथि अमेरिकामा स्टेजमै दुर्व्यवहार भएको थियो । अमेरिकाको न्युयोर्क शहरमा अंग्रेजी नयाँ वर्षको अवसरमा आयोजित कार्यक्रममा सांगीतिक प्रस्तुति दिँदै गर्दा एक व्यक्तिले स्टेजमै चढेर उनी माथि हातपात गरेका थिए ।
