३० चैत ,एजेन्सी ।
इरानले इजरायलमा आक्रमण गर्न सक्ने चिन्तालाई लिएर अमेरिका र इजरायली अधिकारीहरू छलफलमा जुटेका छन् । पेन्टागनका अनुसार अमेरिकी रक्षामन्त्री लोयड अस्टिनले शुक्रबार इजरायलका रक्षामन्त्री योभ ग्यालान्टसँग कुरा गरेका छन् । कुराकानीका क्रममा अमेरिकी रक्षामन्त्रीले इरानबाट हुने सम्भावित खतरामा इजरायलको रक्षा गर्ने प्रतिबद्धतालाई पुनः पुष्टि गरेका छन् ।
अप्रिल १ मा सिरियास्थित इरानी दूतावास परिसरमा इजरायलले घातक हमला गरेको थियो । उक्त हमलामा सात इरानी अधिकारीको ज्यान गएको थियो । इरानका सर्वोच्च नेता अयातोल्लाह अली खामेनीले उक्त घटनामा इजरायलसँग बदला लिनुपर्ने चेतावनी दिएका थिए । इजरायलले गाजामा गरिरहेको आक्रमणका बेला मध्यपूर्वमा यो घटनापछि थप तनाव बढ्न सक्ने चिन्ता बढेको छ ।
इरानले आउँदा केही घण्टाभित्र आक्रमण गर्नसक्ने भन्ने रिपोर्ट समेत आएका छन् । यसबीच मध्य–पूर्वका लागि शीर्ष अमेरिकी जनरलले इजरायल पुगेका छन् । अमेरिकी केन्द्रीय कमान्ड जनरल एरिक कुरिल्लाले इजरायली सैन्य अधिकारीसँगको भेटलाई प्राथमिकतामा राखेका छन् । बेलायतका विदेशमन्त्रीले आफ्ना इरानी समकक्षीलाई तेहरानले मध्यपूर्वलाई थप द्वन्द्वमा धकेल्न नहुने भनेका छन् ।
इजरायलका प्रधानमन्त्री बेन्जामिन नेतान्याहुले गाजा बाहेकका स्थानमा लड्ने गरी तयारी गरिरहेको चेतावनी दिएका छन् । यता इजरायलमाथि ईरानले आक्रमणको चेतावनी दिएपछि अमेरिकाले आफ्ना कर्मचारीमाथि यात्रा प्रतिबन्ध लगाएको छ । इजरायलस्थित अमेरिकी दूतावासले अत्यधिक सावधानी अपनाउँदै इजरायलको राजधानी तेल अबिभ, जेरूशलम र बीयर शेवाभन्दा बाहिर यात्रा नगर्न भनेको छ ।
एक अप्रिलका दिन सिरियास्थित ईरानी वाणिज्य दूतावासमाथि आक्रमण भएको थियो । जसमा १३ जना मारिएका थिए । ईरानको कुद्र्स फोर्सका एक शीर्ष कमान्डर र उनका उपप्रमुखको उक्त आक्रमणमा मृत्यु भएको थियो । ईरानले उक्त आक्रमण इजरायल संलग्न रहेको र अक्रमणको बदला लिने चेतावनी दिइसकेको छ । तर, इजरायलले भने हालसम्म उक्त आक्रमणको जिम्मेवारी लिएको छैन ।
यता, इजरायलमाथि ईरानको आक्रमणले दिएको चेतावनी पछि विभिन्न मुलुकले ईरानलाई संयमता अपनाउँदै कुरालाई अघि नबढाउन आग्रह गरेको छ । अमेरिकी राष्ट्रपति जो बाइडनले ईरानलाई चेतावनी दिँदै इजरायलमाथि आक्रमण नगर्न भनेका छन् भने बेलायतले पनि ईरानलाई आक्रमण नगर्न आग्रह गरेको छ । रुसले पनि दुवैलाई संयमता अपनाउन भनेको छ । गाजामा इजरायल र हमासबीच जारी युद्ध पछि सिरियाका विभिन्न स्थानमा आक्रमण बढेको छ ।
