८ वैशाख , विराटनगर ।
इलाम क्षेत्र नम्बर २ मा उपनिर्वाचनको मिति नजिकिएसँगै प्रमुख दलका उम्मेदवार र शीर्ष नेताहरुले इलाममा डेरा जमाएका छन् । गएको निर्वाचनबाट वैकल्पिक शक्तिका रुपमा संसदमा चौथो ठूलो दलका रुपमा उदाएको राष्ट्रिय स्वतन्त्र पार्टीदेखि सबैभन्दा ठूलो दल कांग्रेस र माओवादीको समेत साथ पाएको दोस्रो ठूलो दल नेकपा एमाले इलाममा आफ्नो विरासत कायम राख्ने लइमा रहेका छन् ।
दुई दिन अघि मात्रै एमाले अध्यक्षले इलाम पुगेर आफ्नो दलका उम्मेदवार सुहाङ नेम्बाङको जिम्मा आफूले लिएको भन्दै इलामेलीसँग जिताएर पठाउन अपिल गरेका थिए । ओली फर्किएसँगै अहिले इलाममा रास्वपाका सभापतिसहितको शीर्ष नेताहरुको टिम तथा नेपाली कांग्रेसका दुई महामन्त्रीसहितको टिम इलामेली जनालाई विश्वासमा लिने अभियानमा जुटिरहेका छन् ।
चुनावी अभियानकै क्रममा नेपाली कांग्रेसका महामन्त्री गगन थापाले वर्तमान सत्ता गठबन्धन माघ महिनासम्म भत्किसक्ने दाबी गरेका छन् । शनिवार इलाममा आयोजित चुनावी सभालाई सम्बोधन गर्दै उनले यस्तो बताएका हुन् । उनले अहिले बनेको गठबन्धनले २०८१ सालको माघ कट्न नसक्ने जिकिर गरे । उनले चुनावको अगाडि गठबन्धन जनतालाई धोका भएको बताए ।
चुनावको अघिको गठबन्धन बेइमानी, मतदाताको स्वतन्त्रताको अपहरण र मतदाताको अवमूल्यन भएको बताए । उनले चुनावअघि गर्ने गठबन्धनलाई अब बिदाई गर्ने बेला आएको समेत बताए । उनले चुनाव अघिको गबठन्धनले देशको राजनीतिलाई विकृत बनाएको समेत बताए । इलामबाट नेपालमा चुनावअघिको गठबन्धनको राजनीति चल्दैन भन्ने सन्देश दिन जरुरी रहेको समेत बताए ।
महामन्त्री थापाले गठबन्धनको राजनीतिले नेपालको राजनीतिलाई फोहोर बनाएको बताए । गएको प्रतिनिधिसभा निर्वाचनमा भने गगनले समेत तत्कालीन अवस्थामा रहेको माओवादी, नेकपाएससहितको गठबन्धनबाट काठमाडौं ४ बाट विजयी भएका थिए। तर अहिलेको उपनिर्वाचनमा एमाले र माओवादीले इलाममा गठबन्धन गरेपछि गगनले बेइमानी, मतदाताको स्वतन्त्रताको अपहरण र मतदाताको अवमूल्यन भएको आरोप लगाएका छन् ।
यस्तै माघमै सरकार ढल्ने घोषणा गरेका गगनले केही साता अघि मात्रै कैलालीमा आयोजित एक कार्यक्रममा कांग्रेसले २०८१ सालमा बालुवाटार र सिंहदरबार नहेरीकन जनताको काममा ध्यान दिनुपर्ने बताएका थिए ।
