१० वैशाख,काठमाण्डौ।
निर्णायक मानिएको सत्तारुढ दल नेकपा एकीकृत समाजवादीका अध्यक्ष माधवकुमार नेपाल र नेपाली कांग्रेसका सभापति शेरबहादुर देउवाबीच वैकल्पिक गठबन्धनका लागि प्रयास जारी राख्ने सहमति भएको भनिएको खबर बाहिरिरहदा अध्यक्ष नेपालले प्रधानमन्त्री प्रचण्डकै सामुन्ने वर्तमान सत्ता गठबन्धनको भविष्यमा प्रश्न उठेको बताएका छन् ।
सोमवार ललितपुरको च्यासलमा आयोजित नरबहादुर कर्मचार्यको तेस्रो वार्षिक केन्द्रीय सभालाई सम्बोधन गर्दै नेपालले वर्तमान सत्ता गठबन्धन लामो समयसम्म जानेमा शंका व्यक्त गरे। नेपालको राजनीति जटिल रहेको बताउँदै उनले भने, ‘छोटो समय भित्र गठबन्धन ओल्टेकोल्टे गरेको छ । कति दिनसम्म यो गठबन्धन टिकिरहने हो भन्ने प्रश्न उठेको उठ्यै छ ।’
गठबन्धनको भविष्यमा उठेको प्रश्नको उत्तर आफूसँग नभएको बताउँदै नेता नेपालले प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले जवाफ दिने बताए । आफूहरु कसैको दास नभएको टिप्पणी गर्दै उनले अहिलेको राजनीतिक परिस्थिति सहज नलागेको बताए । उनले भने, ‘सहज अवस्थामा आफूलाई अनुभूत गरिरहेका छैनौंँ । कसैका धाक, धम्की, कसैका गालीगलौज सुन्नका लागि हामी राजनीतिमा आएका होइनौँ, समाजमा जन्मिएका होइनौँ, राजनीतिमा लागेका होइनौँ कसैको दास बन्ने हाम्रो नियतहोइनौँ।’
सोही कार्यक्रममा प्रधानमन्त्री पुष्पकमल दाहाल ’प्रचण्ड’ले भने राम्रो भविष्यका लागि जोखिम उठाउन तयार हुनुपर्ने बताएका छन् । माधव नेपाललाई जवाफ दिँदै उनले यस्तो बताएका हुन् । ’जोखिम छन् तर राष्ट्रिय एकताको निम्ति जोखिम उठाउन, राष्ट्रिय स्वाधीनता, वामपन्थी एकताको निम्ति जोखिम उठाउनु, कम्युनिस्ट आन्दोलनको राम्रो भविष्यका निम्ति जोखिम उठाउनु राम्रो हो,’ प्रचण्डले भने, ’त्यसमा हामी सबैले साथ र सहयोग गर्नुपर्छ ।’
प्रचण्डलाई साक्षी राखेर माधव नेपालले भनेका थिए, कसैको धाकधम्की सुन्न आएका होइनौँ, गठबन्धन कति दिन जान्छ भन्न सक्दिनँ । कार्यक्रममा प्रचण्डले कम्युनिस्टहरूको बीचमा एकता हुने संकेत गरे । देशको, गणतन्त्रको, राजनीतिक संघर्षका निम्ति कम्युनिस्टहरूबीच एकता आवश्यक रहेकाले २०७४ सालमा वाम एकता गरेको उनले बताए । राम्रो कामका लागि प्रयास जारी राख्ने उनको भनाइ छ ।
कम्युनिस्टहरूको एकतालाई जनताबाट अनुमोदन भएको भन्दै सही कामका निम्ति प्रयास जारी राख्ने प्रचण्डको भनाइ थियो । ’२०७४ को चुनावमा जे प्रयोग हामीले ग¥यौँ । त्यो एकताको प्रयोग थियो र त्यसलाई जनता र आमनेता, कार्यकर्ताले अनुमोदन गरेको पनि हो । विभिन्न कारणले त्यसलाई बचाउन सकेनौँ,’ प्रचण्डले भने, ’तर एक पटक असम्भव भयो भन्दैमा सही कामको निम्ति हामीले प्रयासलाई छोड्न हुँदैन । हामी निरन्तर प्रयास गरी नै राख्नुपर्छ ।’
राष्ट्रिय स्वाधीनता, सुदृढीकरण, लोकतन्त्रको सुदृढीकरण र जनताका दैनिक समस्या समाधानका निम्ति समाजवादको विकल्प नरहेको प्रचण्डले बताए । समाजवाद नै अबको क्रान्तिको बाटो भएको उनको भनाइ छ । कम्युनिस्टहरू कुनै न कुनै रूपले सहकार्य र एकतामा जान आवश्यक रहेको प्रचण्डले बताए । चुनौतीको सामना र जोखिमहरू उठाउँदै अघि बढ्ने कम्युनिस्ट आन्दोलन र वर्ग संघर्षको नियम भएको उनको भनाइ छ ।
