४ जेठ, एजेन्सी ।
गएको मार्च २६ मा अमेरिकाको बाल्टिमोरस्थित पुलमा भयानक दुर्घटना भएको थियो । यो दुर्घटनापछि अझैसम्म जहाजका चालक दल अझै त्यहीँ फसेको खबर बाहिरिएको छ । श्रीलंका जाँदै गरेको सिंगापुरको झण्डा बोकेको ९८४ फिट लामो कार्गो जहाज पुलको पिलरसँग ठोक्किएर दुर्घटना हुँदा बाल्टिमोरको पाटाप्सको नदीमा बनेको २.६ किलोमिटर लामो ‘फ्रान्सिस स्कट की ब्रिज’ भत्किएको थियो ।
यो भयानक दुर्घटनामा ६ जनाको मृत्यु भएको छ । जहाजमा चालक दलका सदस्यमा २० भारतीय र एक श्रीलंकाली नागरिक रहेका छन् । चालक दल दुर्घटना भएदेखि नै सो जहाजमा रहेका छन् । अमेरिकाको फेडरल ब्यूरो अफ इन्भेस्टिगेशन (एफबीआई) ले यो घटनाको अनुसन्धान गरिरहेको छ । चालक दलका सदस्यहरूलाई मुक्त गर्ने प्रयासमा पुलको एक भाग भत्काइएको छ।
घटनापछि जहाज भग्नावशेषमा फसेको र ठूलो चापका कारण जहाजमा फसेका मानिसहरूलाई बाहिर निकाल्न कठिनाइ भएको बताइएको छ । पुलको भग्नावशेषका कारण जहाज अझै अड्किएकै कारण यी मानिसहरू जहाजमै फसेका छन् । मंगलबार जारी गरिएको संघीय अन्वेषकहरूको प्रारम्भिक प्रतिवेदनले विपद् अघि दुईपटक बिजुली अवरुद्ध भएको जनाएको छ।
नेशनल ट्रान्सपोर्टेसन सेफ्टी बोर्डको रिपोर्टले बाल्टिमोर छोड्नु भन्दा दश घण्टा अघि दुईपटक ब्ल्याकआउटको विवरण पनि दिन्छ। अर्काे तर्फ भिसा प्रतिबन्धहरू अनुसन्धानका कारण पनि चालक दल जहाजबाट ओर्लन नसकेको भारतीय संचारमाध्यामहरुले दावी गरेका छन् । दुर्घटनाग्रस्त कार्गो जहाजको नाम ‘द डाली’ रहेको छ । द डालीको मालिक ग्रेस ओशन प्रालिका प्रवक्ता जिम लरेन्सले भने भारतीय चालक दलका सदस्यहरू जहाजमा राम्रो अवस्थामा रहेको बताएका छन् ।
“जहाजमा सामान्य कर्तव्यहरू पालना गर्दै उनीहरुले अनुसन्धान र जारी उद्धार कार्यमा पनि सहयोग गरिरहेका छन्,“ लरेन्सले भनेका छन् । अप्रिलमा, एफबीआईले जहाजलाई लक्षित गर्दै आपराधिक अनुसन्धान सुरु गरेको छ । बाल्टिमोर इन्टरनेशनल सीफेरर्स सेन्टरका अनुशार चालक दलहरुलाई बाहिरी संसारसँगको सम्पर्कबाट टाढै राखिएको छ ।
किनभने तिनीहरूको सेलफोन एफबीआईले अनुसन्धानका लागि जफत गरेको छ। बीबीसीका अनुशार चालक दललाई डेटा समावेश नगरी सिम कार्ड र अस्थायी सेल फोनहरू दिइएको छ । अमेरिकी राष्ट्रपति जो बाइडेनले गत महिना पुलको पुनर्निर्माण गर्ने वाचा गर्दै मेको अन्त्यसम्ममा ढुवानी यातायातको लागि नयाँ च्यानल खोल्ने बताएका छन् ।
