२० जेठ , काठमाण्डौ ।
सन् २०२४ को पहिलो पाँच महिनामा ५ लाखभन्दा बढी पर्यटक नेपाल भित्रिएका नेपाल पर्यटन बोर्डले जनाएको छ। सन् २०२४ जनवरीबाट मेसम्म ५ लाख ६ हजार २ सय ८० पर्यटक नेपाल आएको बोर्डले जनाएको छ। यस्तै २०२४ को मे महिनामा मात्रै ९० हजार २ सय ११ पर्यटक नेपाल आएको बोर्डको तथ्यांकमा उल्लेख छ।
यस्तै जनवरीमा ७९,१००, फेब्रुअरीमा ९७,४२६, मार्चमा १,२८,१६७ र अप्रिलमा १,११,३७६ पर्यटक आएका थिए। नेपाल आउने पर्यटकमध्ये भारतीय पहिलो स्थानमा छन्। पछिल्लो पाँच महिना भारतबाट मात्र १ लाख ४८ हजार ८ सय ६१ पर्यटक नेपाल आएका छन्। मे २०२४ मा मात्र भारतबाट ३८ हजार २ सय ८८ नेपाल आएका छन्।
दोस्रो स्थानमा चिनियाँ छन्। पाँच महिनामा चीनबाट ४६ हजार ६ सय ७१ आएका छन्। मेमा मात्र ८ हजार ३ सय ८१ चिनियाँ नेपाल आएको आँकडा छ। जुन अघिल्लो वर्षको तुलनामा ७९.६ प्रतिशत धेरै हो। अमेरिकाबाट पाँच महिनामा ४५ हजार ३ सय ७३ पर्यटक नेपाल आएको तथ्यांक छ। मे २०२४ मा अमेरिकाबाट ८ हजार ५ सय २७ नेपाल आएका छन्।
अघिल्लो वर्ष यसै महिना अमेरिकाबाट ८ हजार ४ सय ५४ आएका थिए। २०२४ मेमा बंगलादेशबाट अघिल्लो वर्षको तुलनामा ५९.८ प्रतिशत धेरै पर्यटक आएका छन्। त्यहाँबाट कुल ३ हजार ४ सय ५८ नेपाल भ्रमणमा आएको तथ्यांक छ। बेलायतबाट यो महिनामात्र २ हजार ८ सय २ जना नेपाल आएका छन्।
थाइल्यान्ड, म्यानमारजस्ता मुलुकबाट भने नेपालले अपेक्षित पर्यटक भित्र्याउन सकेको छैन। कोभिड अघि २०१९ को मेमा ७८ हजार ३२९ पर्यटक भित्रिएका थिए। २०२० मेमा ३१, २०२१ मेमा १ हजार ५ सय ३१, २०२२ मेमा ५४ हजार ९३ र २०२३ मा मेमा ७७ हजार ७०३ पर्यटक नेपाल भित्रिएका थिए। कोभिड पछि २०२४ मा संख्या बढेको छ।
सरकारले आगामी आर्थिक वर्षमा १६ लाख पर्यटक भित्र्याउने लक्ष्य राखेको छ । संस्कृति, पर्यटन तथा नागरिक उड्डयनमन्त्री हितबहादुर तामाङले यस वर्ष १६ लाख पर्यटक भित्र्याउने लक्ष्यसाथ गृहकार्य भइरहेको बताएका छन् । आइतवार सञ्चारकर्मीहरुसँग कुराकानी गर्दै मन्त्री तामाङले साहसिक पर्यटकलाई आकर्षित गर्ने सोच बनाएको बताएका छन् ।
त्यस्तै धार्मिक तथा सांस्कृतिक पर्यटकलाई पनि आर्कषित गर्ने सरकारको सोच रहेको उनले बताएका छन् । उनले पर्यटकहरुको वृद्धि गर्न हवाई सेवालाई सुलभ, सरल र प्रभावकारी बनाउनुपर्ने अवस्था रहेको भन्दै त्यसतर्फ पनि सरकारको ध्यान रहेको बताएका छन् ।
