२४ साउन विराटनगर ।
कसैले मन पराउनु र कसैको मनमा बस्नु दुई फरक कुरा हुन् । मन पराइनेको नराम्रो पक्ष वा कमजोरी मन नपर्न पनि सक्छ । आज मन पराइनेहरु भोलि मन नपर्न पनि सक्छन् । तर मनमा बसेकाहरु आफ्ना हुन् उनीहरुलाई तमाम कमिकमजोरीका साथ अपनाइएको हुन्छ । अपनत्वले नै उसका गुण, अवगुण, खोट, चोट सबै प्रिय लाग्छ ।
यसैले उसलाई सच्याउने, झक्झक्याउने र मार्गदर्शन गर्ने गरिन्छ । यस मानेमा नेपाल टाइम्स अनलाईन टेलिभिजन भाग्यशाली रह्यो । आफ्ना दर्शक, पाठक, शुभचिन्तकबाट मन पराउने त छदैछ मनमै बस्ने शौभाग्य पायो । वितेको ७ वर्षमा हामीजस्तै थुप्रै नयाँ माध्यम खुले । पूराना त छदैथिए । तर प्यारा दर्शक, पाठकहरुको साथ, माया, समर्थन र हौसला हामीलाई वर्षैपिच्छे झन झन थपिदै गयो ।
तपाईहरुको यही अपनत्वको प्रतिफल हामी सिल्भर बटन हुँदै गोल्डेन बटन नजिक पुग्दैछौं । हामीले शून्यबाट सुरु गरेको यात्रा आज फेसबुकमा १५ लाखबढी, युट्युवमा सात लाख बढी साथीहरु जोडिनु भएको छ । र यो क्रम बढ्दोरुपमा छ । यो सबै तपाईले हामीलाई मनमा राखेका कारणले हो । हामीलाई माया गर्दै, साथ दिदै, सच्याउँदै, सम्झाउँदै यहाँसम्मको यात्रामा डोर्याएको यहाँहरुले नै हो ।
यसका लागि यहाँ सम्पूर्ण दर्शक, पाठकहरुलाई हृदयदेखि नै आभार । आज सातौं वार्षिक उत्सव मनाइरहँदा शुभकामनाको पहिलो हकदार तपाई दर्शकपाठक, शुभचिन्तकहरु नै हुनुहुन्छ । यो अवसरमा हामी यहाँहरुलाई फेरि पनि विश्वास दिलाउन चाहान्छौ कि तपाईहरुको यो साथ र भरोसा व्यर्थ हुने दिने छैनौं । झन हरेक वर्ष हामी तपाईहरुका लागि विश्वासिलो, विश्वसनीय र जवाफदेही बन्न क्रियाशील छौं ।
अरुभन्दा छिटोको होडमा नलागी सत्यतथ्य समाचार, सूचना सम्प्रेषण गरिरहने फेरि एक पटक प्रण गछौं । जसरी हाम्रा समाचार, समाचारमुलक सामाग्रीहरु, सम्पादकीय, विश्लेषण, अन्तर्वाताहरुलाई यहाँहरुले रुचाइदिनु भएको छ, विश्वास गरिदिनु भएको छ । नेपाल टाइम्स एक पटक नहेरी चित्तै बुझ्दैन, निन्द्रा नै लाग्दैन भन्ने यहाँहरुबाट आएका प्रतिक्रिया, यो विषय उठान गनुपर्छ भन्ने जस्ता सुझाव सल्लाहहरु हामी सधैं शिरोपर राख्नेछौ, मनन् गर्नेछौं ।
नेपाल टाइम्स नहेरी चित्त नबुझ्ने मात्रै होइन सूचना र पूर्ण समाचारका लागि नेपाल टाइम्स हेरेपछि अरु हेर्नै नपर्ने बन्नका लागि हाम्रो प्रयत्न हिजो पनि थियो आगामी दिनमा पनि जारी रहनेछ । २०७४ साउन २४ को त्यो दिन फर्केर हेर्दा एकातिर सिमित स्रोतसाधन, श्रब्यदृश्यको दुनियामा टेलिभिजनहरुका माझमा फरक र नौलो प्रयास, थोरै जनशक्ति । तर अथाह उर्जा अनि आवाजविहिनहरुको आवाज बन्ने, नव युगको नयाँ सारथी बन्ने, अनलाइन टेलिभिजनको दुनियाँमा नयाँ केही गर्ने अथाहा विश्वास र हुटहुटी थियो ।
त्यसैको बलमा काम गर्दै थियौं कहिले कोरोना महामारी त कहिले त्यसले बजारलाई पारेको प्रभावमा हामी पनि पर्यौं । योबीचमा अन्य विभिन्न अवरोध, अप्ठ्यारा पनि आए । तर त्यसले रोकिनेवाला हामी कहाँ थियौं र । चुनौतीसंग लड्ने बानी परेका हामीले केही नयाँ कुराहरु स्थापित पो गर्यौ, केही नयाँ ट्रेण्ड चलायौं । जस्तो कि भिडियो सम्पादकीय । विगतमा हुँदै नभएका त होइनन् तर हामीले सुरु गरेपछि यसको अहिले ब्यापक अनुशरण गरिएको छ ।
जसलाई सरहाना गर्दै तपाईहरुले थप उत्पेरणा जगाईदिनु भयो । हाम्रा राष्ट्रिय, अन्तर्राष्ट्रिय, खेलकुद, विज्ञान सबैखाले छोटा भिडियो समाचारहरु, हेडलाइनहरु दर्शकहरुको रोजाईमा परेका छन् । हामीले हरेक दिन घटित राजनीतिक परिदृश्यहरुलाई सकभर छुटाएका छैनौ । राष्ट्रिय राजनीति, त्याहा भित्रका दृश्य र अदृश्य खेलहरु, अन्तर्राष्ट्रिय परिवेशले जनसरोकारलाई पारेको प्रभावलाई हामीले प्राथमिकतामा नै राखेका छौं ।
किसान, मजदुर, युवा, गरिखाने वर्गको मुद्या र विदेशिएकाहरुको पीडा हाम्रा एजेण्डा हुन् । शक्ति, सत्ता र जुनसुकै पदमा बसेर अनैतिक, भ्रष्टाचार गर्ने, जनतालाई दुख दिनेविरुद्ध हामी जहिल्यै खडा भएका छौं । सरकारको सूचक ,सचेत आलोचक र प्रतिपक्षको समेत हामीले भूमिका निर्वाह गर्दै आएका छौं । यसभित्र हामीले पत्रकारिताको धर्म र परिधि कहिल्यै नाँधेका छैनै । नत नाध्ने नै छौं ।
त्यही परिधि भित्र रहेर तपाइँलाई सुसुचित गर्ने हाम्रो कर्ममा सधैं साथ दिनुहुनेछ भन्ने विश्वास लिएका छौं । आगामी दिनमा हामी तपाईहरुसँगै रहेर थप उर्जा, थप आत्मविश्वास, थप कार्यक्रमहरुका साथ थप सशक्त सूचनाको माध्यम बन्ने छौं । अन्त्यमा हाम्रा सबै शुभचिन्तक, विज्ञापनदाता, हाम्रा कर्मठ र जुझारु पर्दा भित्र र बाहिरका कर्मचारी, सम्पूर्ण नेपाल टाइम्स परिवारप्रति हार्दिक आभार तथा आठौं वर्षमा प्रवेश गरेको यो वार्षिक उत्सवको हार्दिक मंगलमय शुभकामना ।
