२८ साउन, विराटनगर । बंगलादेशी प्रधानमन्त्री शेख हसिनाले राजीनामा दिँदै देश छाडेपछि देशका शान्ति स्थापना र चुनाव गर्नका लागि गठन भएको अन्तरिम सरकारको पहिलो बैठकले विभिन्न आठ निर्णयहरू गरेको छ ।
अन्तरिम सरकार प्रमुख मोहम्मद युनुसको निवासमा आइतबार बसेको पहिलो मन्त्रिपरिषद् बैठकले विभिन्न आठ निर्णय गरेको हो ।
१७ सदस्यीय मन्त्रिपरिषदका १६ सदस्य मात्रै आइतबारको बैठकमा सहभागी थिए । मन्त्री नियुक्त भएपनि फारुक–ए–आजमले अहिलेसम्म शपथ लिएका छैनन् । उनी अमेरिकामा छन् । युनुसले मन्त्री नियुक्त गरेको चार दिन बितिसक्दा पनि आजमको बंगलादेश फर्किने समय निर्धारण भइसकेको छैन ।
बंगलादेशी समाचार संस्था द डेली स्टारका अनुसार आइतबारको बैठकले विद्यार्थी आन्दोलनमा घाइते भएकाहरूको उपचार खर्च सरकारले ब्यहोर्ने निर्णय गरेको छ ।
प्रदर्शनमा घाइते भएकाहरूको सूची चाँडै बनाउने र उनीहरूलाई सरकारले नै उपचार गर्ने निर्णय आइतबारको बैठकले गरेको डेली स्टारले लेखेको छ । त्यस्तै प्रदर्शनमा मारिएकाहरूका परिवारलाई पनि सरकारले सहायता दिने निर्णय गरेको छ ।
बंगलादेशमा एक महिनाभन्दा लामो समय चलेको विद्यार्थीहरूको प्रदर्शनका क्रममा ४ सय जनाभन्दा बढीले ज्यान गुमाएको र हजारौं घाइते भएका थिए ।
बैठकले सेख हसिना नेतृत्वको सरकारले करारमा गरेका नियुक्ति खारेज गर्ने निर्णय पनि गरेको छ । हसिनाले विभिन्न सरकारी निकायमा मनलाग्दी ढंगले आफ्ना कार्यकर्ताहरूलाई करारमा नियुक्ति दिएको भन्दै विरोध भएको थियो ।
ती सबै नियुक्तिहरूलाई खारेज गर्ने निर्णय भएको डेली स्टारले उल्लेख गरेको छ । त्यस्तै बंगलादेश बैंकका गभर्नर र धितोपत्र तथा विनिमय आयोगका प्रमुखको राजीनामा पनि बैठकले स्वीकृत गरेको छ ।
रिक्त स्थानमा पदपूर्तिका लागि सिफारिस समिति पनि गठन गरिएको छ । उक्त समितिलाई यथाशिघ्र सिफारिस गर्न भनिएको छ । समितिले सिफारिस गरेपछि सरकारले रिक्त स्थानमा पदपूर्ति गर्नेछ ।
बैठकले देशका केही स्थानमा अल्पसंख्यक जाति तथा धर्मावलम्बीहरूमाथि भएको आक्रमणबारे पनि चिन्ता प्रकट गर्दै ध्यानाकर्षण भएको बताएको छ । अन्तरिम सरकार प्रमुखले तुरुन्त प्रतिनिधि निकाय र अन्य सम्बन्धित समूहसँग बसेर यस्ता जघन्य आक्रमणको समाधानका उपायहरू खोज्ने निर्णय भएको छ ।
त्यस्तै, युनाइटेड अबर इमिरेट्समा प्रदर्शनका क्रममा पक्राउ परेका र सजाय सुनाइएका ५७ बंगलादेशी नागरिकहरुलाई रिहा गर्नका लागि अन्तरिम सरकारले पहल थाल्ने निर्णय गरेको छ ।
बंगलादेशमा विद्यार्थीहरूको आन्दोलनमा समर्थन जनाउँदै युएईमा पनि बंगलादेशीहरूले प्रदर्शन गरेका थिए । प्रदर्शनका क्रममा पक्राउ परेका आफ्ना नागरिकहरूलाई रिहा गर्नका लागि आवश्यक परे अन्तरिम सरकार प्रमुख युनुसले नै संवाद गर्ने निर्णय भएको छ ।
बैठकले जुलाई १८ देखि बन्द रहेको ढाका एक्सप्रेस मेट्रो रेल सञ्चालन गर्ने निर्णय गरेको छ । काजीपारा र मिरपुरका क्षतिग्रस्त स्टेशनहरूमा भने केही दिनका लागि रेल रोकिने भएको छ ।
क्षतिग्रस्त स्टेशन मर्मत भएपछि नियमित चल्ने बताइएको छ । बंगलादेशमा विद्यार्थीहरूको देशव्यापी विरोध प्रदर्शन र नयाँ अन्तरिम सरकारले सत्ता सम्हालेपछि एक पछि अर्को गर्दै विश्वविद्यालयका उपकुलपतिहरूले राजीनामा दिइरहेका छन् ।
यसैबीच कुमिल्ला विश्वविद्यालयका उपकुलपति प्राध्यापक डा. एएफएम अब्दुल मोइनले पनि आइतबार राजीनामा दिएका छन् । मोइनले व्यक्तिगत कारण देखाउँदै आइतबार राजीनामा बुझाएका हुन् ।
‘व्यक्तिगत कारणले मैले आज दिउँसो यो पत्रमार्फत उपकुलपति पदबाट राजीनामा बुझाएको छु,’ विश्वविद्यालयका अध्यक्ष तथा कुलपति शाहबुद्दीनलाई पठाएको राजीनामा पत्रमा उनले लेखेका छन् ।
आफूले कुमिल्ला विश्वविद्यालयका विद्यार्थी, शिक्षक, अधिकारी, कर्मचारीलगायत सबैको सर्वांगीण विकासको कामना गर्ने पनि पत्रमा उनले भनेका छन् ।
यसअघि आइतबारै बंगलादेशको विश्वविद्यालय अनुदान आयोगका अध्यक्ष प्रोफेसर काजी साहिदुल्लाहले राजीनामा दिएका थिए । ढाका विश्वविद्यालय र शाहजलाल विज्ञान तथा प्रविधि विश्वविद्यालयसहित सात विश्वविद्यालयका उपकुलपतिले भने शनिबार राजीनामा दिएका थिए ।
उता हसिनाको राजीनामापछि बंगलादेशमा अल्पसंख्यक समूहविरुद्ध भएको हिंसाको विरोधमा शनिबार लण्डनको संसद भवनबाहिर प्रदर्शन भएको छ । प्रदर्शनकारीहरुले शान्ति र समानताको माग गर्दै नारा लगाएका थिए ।
प्रदर्शनमा विभिन्न मानव अधिकार संगठनका कार्यकर्ता, बंगलादेशी डायस्पोराका सदस्यलगायत सहयोगीहरूको सहभागिता रहेको थियो । ब्यापक प्रर्दशनपछि देश छाडेकी हसिना अहिले भारतको शरणमा छिन् । उनले आफूले अमेरिकाका कारण देश छाड्नु परेको भन्दै चाँडै स्वदेश फर्किने बताएकी छन् ।
