३० साउन, विराटनगर । स्याङ्जाको बिरुवा गाउँपालिका अध्यक्ष सूर्यबहादुर कुँवरविरुद्ध पक्राउ पुर्जी जारी भएको छ । सहकारीको रकम हिनामिना गरेको आरोप लागेपछि फरार बनेका अध्यक्ष कुँवरविरुद्ध सोमबार नै पक्राउ पुर्जी जारी भएको हो ।
उनीमाथि सूर्योदय सहकारीको बचतकर्ताको तीन करोड ६६ लाख रुपैयाँ अपचलन गरेको आरोप छ । रकम हिनामिनाको आशंकापछि गठित छानबिन समितिले तत्कालीन सचिव रहेका कुँवरले बचत रकम अपचन गरी नेकपा एमालेका सांसदलाई निर्वाचन खर्चका रूपमा दिइएको पत्ता लगाएको थियो ।
छानबिनमा दोषी देखिएपछि उनीविरुद्ध पक्राउ पुर्जी जारी भएको छ । उनीसहित बिरुवा सेवा केन्द्रका संयोजक तारेन्द्रबहादुर केसी र मुक्तिनाथ विकास बैंक बिरुवा शाखाकी कर्मचारी सन्ध्या भण्डारीविरुद्ध पक्राउ पुर्जी जारी भएको थियो ।
तारेन्द्र र सन्ध्यालाई यसअघि नै पक्राउ परिसकेका छन् । सहकारीको बिरुवा सेवा केन्द्र प्रमुख जीवन वाग्लेलाई २० दिनअघि पक्राउ गरेर प्रहरीले अनुसन्धान गरिरहेको छ ।
