१ भदौ, काठमाडौं ।
नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले पार्टी एकताबद्ध रहेको र एकताबद्ध भएर केन्द्रीय कमिटी बैठकमा जाने बताएका छन् ।
शनिबार पार्टी केन्द्रीय कार्यालय पेरिस डाँडामा आयोजित पोस्टबहादुर बोगटी स्मृति प्रतिष्ठानको नवौं वार्षिक साधारणसभालाई सम्बोधन गर्दै उनले पार्टी फुट्ने हल्लाको कुनै आधार नरहेको बताए ।
स्थायी कमिटीको बैठकमा केही सदस्यले भिन्न धारणा राखे पनि पार्टी एकजुट भएको उनको भनाइ छ । उनले पार्टी उपमहासचिव जनार्दन शर्माले लिखित रूपमा आफ्नो धारणा राखेको र त्यो फरक मत नरहेको बताए ।
उपमहासचिव शर्माले पार्टी फुटाउन खोजेको नेतृत्वबाट कहिल्यै नभनिएको प्रचण्डको दाबी छ । उनले स्थायी कमिटीको अन्त्यसम्म आउँदा पार्टी फुटाउने जनार्दन शर्माको कुनै नियत र उद्देश्य छैन भन्ने स्पष्ट भएको पनि बताए ।
आफूलाई केही मानिसले पार्टी फुटाउन लागेको भन्ने हल्ला सुनाएकाले केही संशय भने पैदा भएको अध्यक्ष प्रचण्डको स्वीकारोक्ति छ ।
उनले जनार्दन शर्माले पार्टी फुटाउन खोजेको भन्ने भ्रमबाट मुक्त हुन आग्रहसमेत गरे ।
