४ भदौ, विराटनगर ।
एट्लेटिको डी मड्रिडले स्पेनिस ला लिगाको आफ्नो पहिलो खेलमा बराबरी खेल्दै अंक बाँडेको छ । सोमबार राति भएको खेलमा एट्लेटिको भिल्लारियलसँग २-२ गोलको बराबरीमा रोकिएको हो ।
भिल्लारियलको मैदानमा घरेलु टोलीले सुरुआती अग्रता बनाएको थियो । खेलको १८औं मिनेटमा अर्नाउट दान्जुमाले गोल गर्दै अग्रता दिलाए पनि २०औं मिनेटमा गोल गर्दै एट्लेटिको बराबरीमा फर्किएको थियो । पाहुना टोलीका लागि मार्कोस लोरेन्टेले गोल गरेका थिए ।
खेलको ३७औं मिनेटमा एट्लेटिकोका कोकेले आत्मघाती गोल गरेपछि घरेलु टोलीले पुनः अग्रता बनायो ।
पहिलो हाफको इन्ज्युरी समयमा एलेक्जेन्डर सोर्लथले गोल गरेपछि एट्लेटिकोले बराबरी खेलेको हो । खेलको दोस्रो हाफमा भने दुवै टोलीले गोल गर्न सकेनन् ।
