७ भदौ , एजेन्सी ।
अमेरिकाको भर्जिनिया राज्यस्थित मनासस पार्कबाट तीन सातादेखि हराइरहेकी २८ वर्षीया नेपाली नर्स ममता काफ्लेका पति नरेश भट्ट पक्राउ परेका छन् । प्रहरीले भट्टलाई पक्राउ गरेपछि उनको साथमा रहेकी एक वर्षीया छोरीलाई हेरचाह गृह लगिएको छ ।
प्रहरीले उनलाई जमानतमा छुट्न नपाउने गरी जेल चलान गरेको छ । यद्यपि उनीमाथि अनुशन्धान जारी रहेको बताएको छ । प्रहरीले उनीमाथि शव ओसारपसार गरेको, लुकाएको, प्रमाण अल्टर गरेको लगायतका अभियोग लगाइएको छ ।
अब तीन सातादेखि बेपत्ता ममता फर्किएर आउने संभावना सकिएको र उनी संस्मरणमा मात्रै रहेको प्रहरीले बताएको छ । प्रहरीले विज्ञप्तिमा डेड बडी भनेरै उल्लेख गर्दै शव ओसारपसार गरेको, लुकाएको, प्रमाण अल्टर गरेको बताएको छ ।
प्रहरीको यस्तो जानकारी दिएपछि त्याहा रहेका नेपालीहरुले उनको घर बाहिर मैनवत्ती बालेर श्रद्धान्जली अर्पण गरेका छन् । ममता गत साउन १६ (जुलाई ३१) देखि हराएकी हुन् । प्रहरीको अनुशन्धानले ३१ जुलाईमा नै घटना घटेको हुन् सक्ने संकेत गरेको छ।
उनी अगस्ट २ मा यूभीए हेल्थ प्रिन्स विलियम मेडिकल सेन्टरमा हाजिर नभएपछि सहकर्मीले अवस्था बुझिदिनका लागि स्थानीय प्रहरीलाई खबर गरेका थिए । उनीबारे बुझ्न प्रहरी दुई दिनपछि साउन १८ मा घरमै पुगेर पति भट्टसँग सोधपुछ गरेको थियो ।
सुरुमा प्रहरीमा उजुरी दिन नचाहेका भट्ट अगस्ट ५ मा भने प्रहरी कार्यालय पुगेका थिए । उजुरीपछि प्रहरीले अनुसन्धान थालेको थियो । भट्ट भने दुई पटक अफगानिस्तान युद्धमा सहभागी भइसकेका अमेरिकी सेनाका अवकाश प्राप्त अधिकारी रहेको बताइएको छ ।
उनी हराएपछि नेपाली समुदायले प्रहरी कार्यालयबाहिर धर्ना पनि दिन थालेका थिए । प्रहरी कार्यालय अगाडि दिइएको धर्नामा सो क्षेत्रबाट निर्वाचित कंग्रेसम्यान र सिनेटर पनि सहभागी भएका थिए । एक वर्षीया छोरीकी आमा ममताको नेपाल घर काभ्रे रहेको खुलेको छ ।
उनी भर्जिनियामा रजिस्टर्ड नर्स हुन् । प्रहरीले ममताको खोजीमा सहयोग गर्न भर्जिनिया र अन्य अमेरिकी प्रहरी एजेन्सीलाई समेत सूचित गरेको थियो । पछिल्लो समय परिवार, साथी, रोजगारदातालगायतसँग उनको कम सम्पर्क रहेको तथा सामाजिक सञ्जाल प्रयोग पनि कम हुने गरेको प्रहरीले बुधबार जारी गरेको विज्ञप्तिमा उल्लेख छ ।
प्रहरीले ममतालाई सार्वजनिक स्थानमा पछिल्लो पटक जुलाई २८ मा यूभीए हेल्थ प्रिन्स विलियम मेडिकल सेन्टरमा देखेको जनाएको छ ।
मनासस पार्क प्रहरी प्रमुख मारियो लुगोले स्थानीय समयअनुसार बुधबार स्थानीयको उपस्थितिमा पत्रकार सम्मेलन गर्दै ममताका श्रीमान् भट्टले अनुसन्धानमा समन्वय नगरेको बताएका थिए । बुधबार बेलुकीदेखि नै भट्टको घरलाई घेराबन्दी गर्दै प्रहरीले १२ घण्टा खानतलासी गरेको थियो ।
