९ भदौ ,काठमाण्डौ।
साफ यू–२० च्याम्पियनसिपको फाइनल प्रवेशका लागि आज नेपालले सेमिफाइनलको पहिलो खेलमा भुटानसँग खेल्दैछ । सातदोबाटोस्थित एन्फा कम्प्लेक्समा हुने यो खेल अपराहन्न ३ बजेदेखि शुरु हुने छ । प्रतियोगितामा नेपाल समुह ए का दुवै खेल जितेर समूह विजेता हुदै सेमिफाइनल खेल्दै छ । नेपालले समूह चरणमा श्रीलंकालाई १–० ले बंगलादेशलाई २–१ गोल अन्तरले पराजित गरेको थियो ।
भुटान भने समूह बी मा उपविजेता बन्दै नेपालसँगको भेट पक्का गरेको हो । भुटानले माल्दिभ्सलाई २–१ ले पराजित गरेको थियो भने भारतसँग १–० ले पराजित भएको थियो । दोस्रो सेमिफाइनलमा भारत र बंगलादेश भिड्ने छन् । यीदुई बीचको खेल सोमबार हुने छ । प्रतियोगिताको फाइनल खेल बुधबार दशरथ रंगशालामा हुने तालिका छ ।
यसअघि अखिल नेपाल फुटवल संघ (एन्फा)ले सेमिफाइनलका खेलहरु पनि दशरथ रङ्गशालामा हुने बताएको थियो । तर साफले पठाएको म्याच कमिस्नरले त्रिपुरेश्वरमा रहेको दशरथ रङ्गशालाको मैदान अझै खेलाउन योग्य नदेखिएको रिपोर्ट दिएपछि खेल्ने ठाउँ सारिएको हो । अघिल्लो संस्करणमा बंगलादेशलाई पराजित गर्दै भारतले उपाधि जितेको थियो। यो संस्करणमा घरेलु मैदानको उपाधि रक्षा गर्ने नेपालले लक्ष्य बनाएको छ।
