१५ भदौ, विराटनगर ।
नेपाल क्रिकेट संघ (क्यान) ले हालै अमेरिका र वेस्टइन्डिजमा भएको आइसिसी टी–२० विश्वकप क्रिकेटमा सहभागी खेलाडीलाई जनही तीन लाख रुपैयाँ पुरस्कार प्रदान गर्ने भएको छ ।
क्यान कार्यसमिति बैठकले टोलीका खेलाडीलाई तीन लाख र अन्य सपोर्ट स्टाफलाई जनही एक लाख ५० हजार रुपैयाँ पुरस्कार प्रदान गर्ने निर्णय गरेको हो ।
नेपालले विश्वकपमा खेलेको चार खेलमा तीन हार खेपेको थियो । एक खेल वर्षाका कारण रद्द भएको थियो ।
यस्तै क्यानले सातवटै प्रदेशका क्रिकेट संघमार्फत प्रत्येक प्रदेशमा दुई जना महिला र तीन जना पुरुष खेलाडीलाई १५/१५ हजार रुपैयाँ पारिश्रमिक दिने निर्णय गरेको छ ।
उक्त निर्णय सेप्टेम्बर १ तारिखदेखि एक वर्षका लागि लागू हुने बताइएको छ ।
