२३ भदौ, विराटनगर ।
स्पेनिस युवा स्टार लामिन यमल किंग्स लिग वर्ल्डकपमा अनुबन्धित भएका छन् । बार्सिलोनाबाट व्यावसायिक फुटबल खेल्दै आएका १७ वर्षीय यमल स्पेनका पूर्वस्टार जेरार्ड पिकेको किंग्स लिगमा अनुबन्ध भएको अन्तर्राष्ट्रिय सञ्चारमाध्यमले जनाएका छन् ।
आइतबार राति किंग्स लिग वर्ल्डले सामाजिक सञ्जालमार्फत युवा प्रतिभावान खेलाडी यमल अनुबन्ध भएको जनाएको हो । तथापि, यमललाई कुन भूमिकामा अनुबन्ध गरिएको भन्ने खुलाइएको छैन । केही दिनमै यसबारे टुंगो लाग्ने स्पेनिस मिडिया ‘स्पोर्ट्स’ले जनाएको छ ।
चौथो संस्करणको उक्त प्रतियोगिता १५ सेप्टेम्बरबाट बार्सिलोनास्थित कुप्रा एरियामा हुने छ । किंग्स लिगको थालनी सन् २०२२ मा बार्सिलोनाका पूर्वडिफेन्डर पिकेले गरेका थिए ।
टाइ-ब्रेकर पेनाल्टी सुटआउट ढाँचाको उक्त प्रतियोगिता ज्लाटान इब्राहिमोभिक, इकर क्यासिल्लास, सर्जियो अग्युएरो, रोनाल्डिन्हो, इडेन हाजार्डले पनि खेलिरहेका छन् ।
स्पोर्ट्स मिडियाका अनुसार प्रतियोगिता खेल्ने अरू खेलाडीहरूको छिनोफानो आगामी बुधबारसम्ममा लागि सक्ने छ । पहिलो संस्करणको उपाधि भने गत जुनमा स्पेनको पोर्सिनो एफसीले जितेको थियो ।
