२५ भदौ, विराटनगर ।
इटालीले चौथौ संस्करणको युरोपियन नेसन्स लिगमा आफ्नो उडान कायमै राखेकाे छ । सोमबार राति भएको दोस्रो चरणको खेलमा इटालीले इजराइललाई २-१ गोलले हराएको हो ।
हंगेरीको बुडापेस्टमा दर्शकबिना खेलाइएको खेलमा इटालीलाई जिताउन डेभिड फ्रेटेसी र मोइस केनले एक-एक गोल गरे । इजराइलका मोहम्मद अबु फानीले गरेको गोल सान्त्वना बन्यो ।
खेलको ३८औं मिनेटमा फ्रेटेसीले डिमाक्रोको पासमा गोल गर्दै इटालीलाई सुरुआती अग्रता दिलाएका थिए । ६२औं मिनेटमा केनले रिबाउन्डमा गोल गर्दै इटालीको अग्रता २–० मा पुर्याए ।
खेलको ९०औं मिनेटमा इजरायली टोलीका मोहम्मद अबु फानीले फ्रिकिकबाट गोल गरेपनि पर्याप्त हुन सकेन । योसँगै लुसियानो स्पालेट्टीको टोली नेसन्स लिग ए समूह २ को शीर्ष स्थानमा कायमै रहन सफल भएको छ ।
शुक्रबार राति भएको पहिलो खेलमा फ्रान्सलाई ३–१ ले पराजित गरेको थियो । योसँगै इटाली ६ अंकका साथ तालिकाको शीर्ष स्थानमा उक्लिएको हो ।
नेसन्स लिगमा इजराइलसँगका खेल बन्द रंगशालामा खेलाइँदै छ । इजराइल-हमास युद्ध जारी रहेका बेला यसअघि बेल्जियमका थुप्रै सहरले सुरक्षाको जोखिम औंल्याउँदै इजराइलसँगको खेल आयोजना गर्न अस्वीकार गरेका थिए ।
त्यसपछि युरोपियन फुटबल महासंघले उक्त खेल हंगेरीमा बिनादर्शक खेलाउने निर्णय गरिएको थियो ।
गत अक्टोबरमा बेल्जियम र स्विडेनबिचको युरो २०२४ छनोट खेलअघि एक बन्दुकधारीले दुई स्विडिस समर्थकको हत्या गरेका थिए ।
युइएफएले बेल्जियमको किङ बाउडिन स्टेडियममा गराउने तय गरेको थियो । तर, बेल्जियम फुटबल संघले भने सुरक्षा चुनौती हुने भन्दै अस्वीकार गरेपछि हंगेरीमा दर्शकबिना खेलाइएको थियो ।
