२७ भदौ , काठमाण्डौ ।
पशुपतिनाथ मन्दिर परिसरमा आयोजित कोटीहोमका आयोजक विजय कृष्णमुर्ति महाराज भनिने विजय भण्डारीलाई कीर्ते चारित्रिक प्रमाणपत्र दिनेको विवरण खुलेको छ । विजयले प्रहरीबाटै झूटो चारित्रिक प्रमाणपत्र प्राप्त गरेको पुष्टि भएको छ । उनले कीर्ते गरेर चारित्रिक प्रमाणपत्र बनाएको हुन सक्ने आशंकामा प्रहरीले अनुसन्धान गरेको थियो ।
प्रहरीको आन्तरिक छानबिनमा भण्डारीले प्रहरीबाटै उक्त प्रमाणपत्र लिएको खुलेको हो । ठगीमा मुद्दा परेर दोष ठहर भई जेल सजाय समेत भोगेका भण्डारीले कोटीहोम आयोजनापूर्व प्रहरीबाट ‘निस्कलंक’ प्रमाणपत्र लिन सफल भएका थिए ।
सोही प्रमाणपत्रबारे अनुसन्धानका लागि प्रहरीले उनलाई कोटी होमस्थलबाट पक्राउ गर्न खोजे पनि सफल भएको थिएन । सो क्रममा त्यहाँ केही तनावसमेत भएको थियो । केही महिनाअघि भण्डारीले चारित्रिक प्रमाणपत्रका लागि निवेदन दिएका थिए ।
त्यसपछि काठमाडौं प्रहरी परिसरले उनीविरुद्ध मुद्दा परे पनि सफाइ पाइसकेको भनेर प्रहरी प्रधान कार्यालयलाई जवाफ पठाएको थियो । त्यही आधारमा भण्डारीले उक्त प्रमाणपत्र पाएको देखिएको छ । पशुपति कोटीहोम आयोजना भइरहेका बेला उनको आपराधिक गतिविधिमा संलग्नतालाई जोडेर समाचारहरू आएपछि उनले चारित्रिक प्रमाणपत्र सार्वजनिक गरेका थिए।
त्यसपछी काठमाडौं प्रहरी परिसरले यो विषयमा छानविन गर्न समिति बनाएको थियो । उक्त समितिले प्रहरीबाटै त्रुटि भएको निस्कर्ष निकालेको छ । ‘हाम्रै प्रहरी अधिकारीले उनको विगत हेर्ने क्रममा त्रुटि गरेको देखिन्छ’, समितिको निष्कर्षबारे एक अधिकारीले भने ।
ती अधिकारीका अनुसार परिसरका एक सहायक निरिक्षक– असईले भण्डारीले सफाई पाएको भनेर जवाफ पठाएका थिए । ‘ती असईले आफु झुक्किएको बताएका छन’, उनले भने । काठमाडौं प्रहरी प्रहरीले ती असईमाथी कारबाहीको तयारी गरेको छ ।
यसैबीच कोटीहोममा घाटा लागेको आयोजकले दाबी गरेका छन् । पशुपतिनाथ परिसरमा साउन महिनाभर कोटीहोस सञ्चालन भएको थियो । विजय भण्डारीले पत्रकार सम्मेलन गर्दै आम्दानीभन्दा खर्च धेरै भएको विवरण प्रस्तुत गरेका हुन् ।
कृष्णमुर्तिका अनुसार कोटीहोममा कुल २० करोड १५ लाख ८२ हजार ४९० रुपैयाँ १५ पैसा बराबर नगद र द्रव्य दान संकलन भएको थियो । यस्तै, कोटीहोमका लागि २० करोड ८८ लाख ३२ हजार ७९४ रुपैयाँ ३८ पैसा खर्च भएको उनले बताए ।
यस अनुसार ७२ लाख ५० हजार ३०४ रुपैयाँ घाटा भएको कृष्णमुर्तिले दाबी गरेका छन् । महायज्ञमा कबोल भएको मध्ये डेढ करोडदेखि २ करोड रुपैयाँ आउन बाँकी रहेको पत्रकार सम्मेलनमा उनले बताए ।
