३१ भदौ, एजेन्सी ।
अर्जेन्टिनी स्ट्राइकर लियोनल मेसी इन्टर मियामीका लागि खेल्न अमेरिका पुगेको गत जुलाईमा एक वर्ष पूरा भयो । अमेरिकन मेजर लिग सकरको २०२३-२४ को सिजन आधाभन्दा धेरै सकिएपछि मियामी पुगेका मेसीले चोटका कारण यो सिजनका पनि केही खेल गुमाए ।
अघिल्लो वर्षको जुलाईमा फ्रान्सको राजधानी छोडेर पिएसजी मेसीले मियामीका लागि ३० खेलमा २७ गोल गरेका छन् । अब, तीन गोल गरेमा मेसी मियामीका लागि सर्वाधिक गोल गर्ने खेलाडी बन्ने छन् ।
डेभिड बेकह्यामकाे क्लब मियामीका लागि सर्वाधिक गोल कर्ता फ्रान्सका पूर्वफरवार्ड गोन्जालो हिगुइनको नाममा छ । रियल मड्रिडका पूर्वखेलाडी हिगुइनले मियामीका लागि ७० खेलमा २९ गोल गरेका थिए ।
गत वर्षमात्र हिगुइनले खेल जीवनबाट सन्न्यासको घोषणा गरिसकेका छन् । पूर्वप्रतिद्वन्द्वीसमेत रहेका हिगुइनको रेकर्ड आफ्नो नाममा सार्ने लक्ष्यमा मेसी हुने छन् ।
३७ वर्षीय मेसी हालैमात्र मेजर लिगका पछिल्ला आफूले खेलेका १९ खेलमा १५ गोल र १६ असिस्ट गर्ने पहिलो खेलाडी बनेका थिए । मेसीले जारी सिजनमा १३ मात्र खेल खेल्दा १४ गोल र १० असिस्ट गरेका छन् । सन् २०२४ मा उनले मियामीका सबै प्रतियोगितामा गरी २९ खेलमा २५ गोल गर्दा १६ गोलमा पास मिलाएका थिए ।
यसअघि बार्सिलोना र पिएसजीका लागि खेलेका मेसीले सबै क्लबमा ७३१ गोल र ३२० असिस्ट गरेका छन् । समग्र फुटबल करिअरमा ८४० गोल गरेका मेसीले ३७५ गोलमा पास मिलाइदिएका छन् ।
