८ असोज , एजेन्सी ।
नेपालमा ठूला ठूला घोटाला,अर्बौको भ्रष्टाचारका प्रकरणहरुमा कयौं नेताहरुको नाम मुछिदा आक्कल झुक्कलले मात्रै सजाय पाउँने गरेकोमा सिंगापुरमा भने उपहार लिएकै आरोपमा एक पूर्वमन्त्री दोषी ठहर भएका छन् ।
विश्वकै धेरै तलब खाने मन्त्री उपहार लिएपछि दोषी ठहर भएका छन् । सिङ्गापुरका पूर्व यातायात मन्त्री सुब्रमण्यम ईश्वरन भ्रष्टाचार मुद्दामा स्थानीय अदालतबाट दोषी ठहर भएका छन् ।
उनले पदमा रहँदा उपहार प्राप्त गरेको आरोप लागेको थियो । ६२ वर्षीय ईश्वरनलाई शुरूमा भ्रष्टाचारको आरोप लगाइएको थियो तर अभियोजनकर्ताले सुनुवाइ शुरू हुने क्रममा यी आरोपको केही परिमार्जन गरेका छन् ।
सार्वजनिक अधिकारी वा व्यक्तिलाई भ्रष्टाचारको मुद्दा लाग्नु सिङ्गापुरमा दुर्लभ मानिन्छ । ईश्वरनलाई एक अर्बपति घरजग्गा कारोबारीको व्यावसायिक हित प्रवर्द्धन गरेबापत उपहार र सुविधा लिएको लगायतको आरोप लागेको थियो ।
अब ईश्वरनले आफूले लिएको प्रत्येक उपहार वा फाइदाका लागि जरिबाना वा दुई वर्षसम्मको जेल सजाय पाउन सक्छन् । भ्रष्टाचारको मुद्दा चलेर दोषी ठहर भएको भए चाहिँ उनलाई एक लाख सिङ्गापुर डलरसम्म जरिवाना वा सात वर्षसम्म जेल सजाय हुन सक्थ्यो ।
ईश्वरन सिङ्गापुरमा विगत ५० वर्षमा अदालतमा मुद्दा खेप्ने सार्वजनिक पदधारण गरेका तथा राजनीतिक पृष्ठभूमि भएका प्रथम व्यक्ति हुन् । उनको यो मुद्दाले सिङ्गापुरमा निकै ठूलो चर्चा पाएको छ ।
उनलाई सिङ्गापुरमा पहिलो पटक ’फर्मूला वन ग्र्यान्ड प्रिक्स’ आयोजना गर्ने व्यक्तिको रूपमा समेत चिनिन्छ । उक्त प्रतियोगिताको पछिल्लो संस्करण उनलाई अदालतमा उपस्थित गराइनु केही दिनअघि मात्र सम्पन्न भएको थियो ।
उनीविरुद्धको अभियोगपत्रमा ईश्वरनलाई चार लाख ३,००० सिङ्गापुर डलरभन्दा बढीको हवाई टिकट, होटलमा बसोबासको सुविधा, साङ्गीतिक कार्यक्रम र ’ग्र्यान्ड प्रिक्स’का टिकटहरू उपहारका रूपमा दिइएको उल्लेख छ ।
गत ज्यानुअरीमा अभियोग लागेलगत्तै उनले आफू दोषी नभएको दाबी गर्दै सरकारबाट राजीनामा दिएका थिए । उनले आफूमाथि लागेको कलङ्क मेट्न आफ्नो ध्यान केन्द्रित गर्ने बताएका थिए ।
उनले घरजग्गा कारोबारी ओङ बेङ सेङको व्यापारमा फाइदा पुग्ने गरी सघाएको आरोप लगाइएको थियो । त्यसबापत सेङले उनलाई घुस दिएको कुरा अभियोगपत्रमा उल्लेख थियो । गत मार्चमा ईश्वरनमाथि थप आठवटा अभियोग लगाइयो।
ती अभियोगमा उनले निर्माण व्यवसायी लुम कोक सेङसँग एउटा महँगो साइकल, गल्फ खेल्ने एक सेट क्लब र ह्विस्कीसहित विभिन्न उपहार लिएको कुरा समाविष्ट छन् । विश्वभरिकै एउटा वित्तीय केन्द्रका रूपमा स्थापित उक्त देशले भ्रष्टाचारको मामिलामा आफ्नो छवि निकै स्वच्छ रहेको देखाउँदै आएको छ ।
सन् २००० र सन् २०१० को दशकमा सिङ्गापुरको पर्यटन क्षेत्रलाई अघि बढाउन ईश्वरनले महत्त्वपूर्ण भूमिका निर्वाह गरेका थिए । त्यो समयमा सरकारले ठूलो स्रोत र साधन परिचालन गरेको थियो।
क्यासिनो, होटल, पर्यटकीय आकर्षणका केन्द्र र एफवन रेसजस्ता कार्यक्रममा अर्बौँ डलर बराबरको विदेशी लगानी भएको थियो । एफवन रेसका विजेताहरूलाई उपाधि दिने कार्यक्रममा पनि उनी नियमित रूपमा सहभागी हुन्थे ।
उनै ईश्वरनविरुद्धको मुद्दा पीपल्स एक्शन पार्टीका लागि एउटा अर्को लज्जाजनक विषय बनेको छ । लामो समयदेखि भ्रष्टाचार र अनैतिक व्यवहारप्रति आफ्नो कडा अडान रहेको बताउने गरेको उक्त दल एकपछि अर्को राजनीतिक विवादमा मुछिएको छ ।
सिङ्गापुरका सांसदहरू विश्वमा सबैभन्दा धेरै तलब प्राप्त गर्नेमध्ये पर्छन्। त्यहाँ केही मन्त्रीहरूको आम्दानी १० लाख सिङ्गापुर डलरभन्दा बढी छ । नेताहरूले आकर्षक तलबले भ्रष्टाचार न्यूनीकरणमा सहयोग पुग्ने तर्क गर्दै आएका छन् ।
