१० वैशाख , एजेन्सी ।
रुसी राष्ट्रपति भ्लादिमिर पुटिनले एक पटक फेरि परमाणु आक्रमणको चेतावनी दिएका बेला र चीनले पनि लामो समयपछि अन्तरमहादेशीय ब्यालेस्टिक मिसाइल सफलतापूर्वक प्रक्षेपण गरिएको दाबी गरेका बेला न्युर्योकमा जारी संयुक्त राष्ट्रसंघको महासभामा भने स्वयं रुस र उसको मित्र रहेको चीनका विदेशमन्त्रीहरुले युक्रेन युद्धबारे छलफल गरेका छन् ।
चीन र रूसका विदेशमन्त्रीहरूले संयुक्त राष्ट्रसङ्घीय महासभामा युक्रेन युद्धबारे छलफल गरेका छन् । पछिल्लो समयमा चीन र रूसको सम्बन्ध बलियो भएको छ भने सन् २०२२ मस्कोले युक्रेनमा आक्रमण गरेपछि द्विपक्षीय व्यापारले बढवा पाएको छ ।
पश्चिमी मुलुकहरूले रूसको आक्रामक युद्धको समयमा बेइजिङले राजनीतिक आवरण र आर्थिक समर्थन प्रदान गरेको आरोप लगाएका छन् । आरोपलाई चीनले अस्वीकार गर्दै द्वन्द्वमा तटस्थता कायम राखेको जनाएको छ ।
यसबीच युक्रेनको प्रमुख ढाडस रहेको अमेरिकामै चीन र रुसका विदेशमन्त्रीहरुले युद्धकै बारेमा छलफल गरेका हुन् । चिनियाँ सरकारी सञ्चारमाध्यम सिसिटिभीले बिहीबार विदेशमन्त्री वाङ्ग यीले संयुक्त राष्ट्रसङ्घीय महासभामा आफ्ना रूसी समकक्षी सर्गेई लाभरोभलाई भेटवार्ता गरेको जनाएको छ ।
छलफलमा दुवै पक्षले युक्रेन सङ्कटलगायत विषयमा विचार आदानप्रदान गरेको सिसिटिभीले उल्लेख गरेको छ । विदेशमन्त्री वाङले द्विपक्षीय सम्बन्ध उतार–चढावबाट गुज्रिएको उल्लेख गर्दै स्थायी असल छिमेकीको रुपमा चीन–रूस सम्बन्धलाई अगाडि बढाउने उल्लेख गरेका छन् ।
चीन र रूसले ‘नो–लिमिट्स’ साझेदारीअनुरुप विश्वव्यापी मामिलामा अमेरिकी नेतृत्वको पश्चिमी प्रभुत्वको विरोध गर्दै आएका छन् । बेइजिङ र मस्कोले यस वर्ष कूटनीतिक सम्बन्ध स्थापनाको सातौँ वार्षिकोत्सव मनाउँदै छन् ।
चिनियाँ राष्ट्रपति सी चिनफिङले आगामी महिना रूसमा हुने उदीयमान अर्थतन्त्रहरूको ब्रिक्स शिखर सम्मेलनमा पनि भाग लिने कार्यक्रम तय भएको छ । यसअघि बुधबार भारतीय विदेशमन्त्री एस.जयशंकरले रुसी विदेशमन्त्री सर्गेई लाभरोभलाई भेटेका थिए ।
भेटबारे सामाजिक सञ्जालमा जानकारी दिदै जयशंकरले लेखेका छन्, ‘संयुक्त राष्ट्रसंघ महासभाको ७९ औँ सत्रको बैठकमा रुसी विदेशमन्त्रीसँग छुट्टै भेट भयो । ‘भेटमा मैले भारत–रुस सम्बन्ध र क्षेत्रीय मुद्दाहरूबारे कुरा गरे’ पोस्टमा जयशंकरले लेखेका छन् ।
यसअघि रुसको विदेश मन्त्रालयले ट्वीट गर्दै यी दुईबिच भएको भेटको जानकारी दिएको थियो । लाभरोभसँगको भेटमा जयशंकरसँग के–के कुरा गरे भन्नेबारे आधिकारिक जानकारी दिइएको छैन । तर, युक्रेन द्वन्द्व अन्त्य गर्न भारतको भूमिकाबारे दुवैबिच छलफल भएको बुझिएको छ ।
हालै रुसी राष्ट्रपति भ्लादिमिर पुटिनले युक्रेन सङ्कट समाधान गर्न चीन, भारत र ब्राजिलले सहयोग गर्न सक्ने बताएका थिए । रुस भ्रमणका क्रममा पुटिनसँगको भेटमा प्रधानमन्त्री नरेन्द्र मोदीले यो सङ्कट समाधानका लागि भारत सहयोग गर्न इच्छुक रहेको बताएका थिए ।
युक्रेनी राष्ट्रपति भोलोदिमिर जेलेन्स्कीलाई पनि भारतले यस संकटको शान्तिपूर्ण समाधान चाहेको मोदीले बताएका थिए । यस्तै प्रधानमन्त्री मोदीले युक्रेनी राष्ट्रपतिलाई दोस्रो पटक न्युयोर्कमा भेटेका थिए ।
अमेरिकामा यो भेटघाट चलिरहेका बेला रुसी राष्ट्रपतिले एक पटक फेरि पश्चिमी देशहरूलाई आणविक हतियार प्रयोग गर्ने धम्की दिएका हुन् । देशको आणविक नियममा धेरै नयाँ कुरा थपिने पुटिनले बताएका छन् ।
यसमा रुस विरुद्ध मिसाइल वा ड्रोन हमलाहरू विरुद्ध परमाणु हतियारको प्रयोग पनि समावेश छ । यदि रुसी क्षेत्रमा ठुलो मात्रामा मिसाइल वा ड्रोन आक्रमण भयो भने यसले देशको सार्वभौमसत्तालाई गम्भीर रूपमा खतरामा पार्न सक्छ ।
त्यस्तोमा रुसले पनि आणविक हतियारहरू प्रयोग गर्न सक्ने भनिएको छ ।
