१४ असोज , काठमाण्डौ ।
उर्लिदो भेलमा आफ्नो ज्यानको समेत प्रवाह नगरी नख्खु खोलाको बाढीमा बग्दै गरेका २ सर्वसाधारणलाई उद्धार गरेका काभ्रेका चणिकलाल तामाङलाई बागमती प्रदेश सरकारले सम्मान गर्ने भएको छ।
यस्तै कार्यवाहक प्रधानमन्त्री प्रकाशमान सिंहले पनि सम्मान गरेका छन् । यस्तै उनलाईमहालक्ष्मी विकास बैंकले १ लाख नगदसहित सम्मान गरेको छ ।चणिकलाललाई डेढलाख रुपैयाँ नगदसहित सम्मान गर्ने घोषणा प्रदेश सरकारले गरेको छ ।
प्रदेशका मुख्यमन्त्री बहादुरसिंह लामाले चणिकको सहासिक कामबाट दुई जनाको ज्यान जोगिएको भन्दै प्रदेश सरकारले सम्मान गर्न लागेको बताएका छन् । काभ्रेको तेमाल गाउँपालिका– ९ चोकटारका तामाङले गत शनिबार नख्खु खोलामा बग्दै गरेका रौतहटका राजु साहकी छोरी ६ बर्षीया मेघना साह र राजुका भाइ २२ बर्षीय राज साहको उद्दार गरेका थिए।
तामाङलाई टेलिफोनमार्फत् साहासिक कामका लागि धन्यावाद दिएको बताउँदै मुख्यमन्त्री लामाले प्रदेश सरकारले नगदसहित सम्मान गर्न लागिएको बताएका छन् । यसैगरी कार्यवाहक प्रधानमन्त्री प्रकाशमान सिंहले नख्खु खोलाले बगाएका दुई जनाको उद्धार गर्ने चणिकलाल तामाङको साहसको प्रशंसा गर्दै सम्मान गरेका छन् ।
सोमबार सहरी विकास मन्त्रालयमा सिंहले तामाङलाई सम्मान गरेका हुन् । कार्यवाहक प्रधानमन्त्री सिंहले मानवीय भावना देखाएर नदीमा बगिरहेकाहरूको उद्धार गरेको भन्दै तामाङको साहसी कामको प्रशंसा गरेको उनको सचिवालयले जानकारी दिएको छ ।
यस्तै तामाङलाई महालक्ष्मी विकास बैंकले सम्मान गरेको छ । आइतबार बैंकको केन्द्रीय कार्यालयमा आयोजित एक कार्यक्रमकाबीच चणिकलाल तामाङले जोखिमका बीच देखाएको अदम्य साहस र उनको अठोट र तत्परताले राजु शाह र उनको परिवारको सदस्यको सफल उद्धार गर्न सकिएको निष्कर्षका साथ तामाङलाई १ लाख रुपैयाँ नगदसहित सम्मान गरिएको हो ।
यस्ता कार्यले विपतको समयमा नागरिक स्तरबाट सुरक्षित रुपमा उद्घार कार्यमा सहभागिता जनाउनसमेत हौसला मिल्ने विश्वास बैंकले लिएको छ । उर्लिदो भेलमा आफ्नो ज्यानको समेत प्रवाह नगरी बाढीमा बग्दै गरेका सर्वसाधारणलाई उद्धार गरेका चणिकलालको चर्चा सर्वत्र छ ।
आइतबारै पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले पनि तामाङलाई सम्मान गरेका छन्। आइतबार आफ्नै निवास खुमलटार बोलाएर प्रचण्डले चणिकलाललाई सम्मान गरेका हुन्।
चणिकलाललाई सम्मान गर्दै अध्यक्ष प्रचण्डले सरकारले गर्न नसकेको काम गरेर दुईजनालाई नयाँ जीवन दिएकोमा बधाई तथा धन्यवाद व्यक्त गरे। ‘संकटको वेला नै बहादुरहरूको जन्म हुन्छ,’ उनले भने, ‘तपाईंले आफू बहादुर भएको प्रमाणित गर्नुभएको छ।’
चणिकलालको चर्चा अहिले देश–विदेशमा भइरहेको भन्दै खुसी लागेको बताए। चणिकलालले शनिबार ललितपुर महानगरपालिका– २५ सुगमटोलस्थित नक्खु खोलाले बगाएका रौतहटका ४३ वर्षीय राजु साह र उनकी छोरी ६ वर्षीया मेघनालाई उद्धार गरेर बचाएका थिए।
टहराको छानामाथि चढेर गुहार मागिरहेका चारजनालाई सरकारी निकायले उद्धार गर्न नसकेपछि उनीहरू टहरासँगै बगेका थिए। खोलाले बगाएर झन्डै तीन सय मिटर तल पु¥याएका वेला देखेपछि उर्लँदो भेलमा हामफालेर चणिकलालले दुईजनाको उद्धार गरेका थिए।
उद्धार गरिएका दुवैजनाको हाल पाटन अस्पतालमा उपचार भइरहेको छ। सँगै बगेका राजुका भाइ २२ वर्षीय राज आफैँ पौडेर निस्किएका थिए भने उनकी चार वर्षीया छोरी सेर्तु बेपत्ता छिन्।
