१८ असोज , विराटनगर ।
असोज १२ र १३ गतेको मनसुनजन्य विपद्का कारण काठमाडौं उपत्यकासहित देशभरका नागरिकहरुको जनजीवन अस्तव्यस्त छ । कतिपयको बासस्थान नै बगाएको÷डुबानमा परेको छ । जसरकारण पनि आम नागरिकहरुको जनजीवन प्रभावित छ ।
काठमाडौं उपत्यका भित्रै वागमती, हनुमन्ते खोला, ललितपुरको नख्खु खोलाले बगाएर धेरै मानिसहरुको ज्यान गएको छ । विपद्को यो अवस्थामा निजी क्षेत्र लगायत, विभिन्न संघ संस्था र दातृ निकायहरुबाट समेत सहयोग गर्दै आएका छन् ।
पीडितहरुलाई स्थानीयले समेत त्यतिनै सहयोग गर्दै आएका छन् । चिनियाँ कम्युनिस्ट पार्टी केन्द्रीय समितिको अन्तर्राष्ट्रिय विभागले नेपालका राजनीतिक दलहरुलाई बाढीपीडितका लागि राहत सामग्री उपलब्ध गराएको छ।
कुल १ करोड ९० लाख ७० हजार रुपैयाँबराबरको सामग्री विभागले उपलब्ध गराएको छ। ७५औँ चिनियाँ राष्ट्रिय दिसको अवसरमा विभागले काठमाडौंको एक विद्यालयमा एक कार्यक्रममाझ सहयोग उपलब्ध गराएको हो।
कार्यक्रममा नेपालस्थित चिनियाँ दूतावासका काउन्सिलर वाङ सिन, नेपालका मुख्य राजनीतिक दलका प्रतिनिधि, ग्रामीण विकासका लागि चिनियाँ फाउन्डेसनको नेपालस्थित कार्यालयका प्रतिनिधि, स्थानीय सरकारका प्रतिनिधि र स्थानीयवासीको सहभागिता रहेको थियो।
कार्यक्रममा नै अत्यावश्यक वस्तु र खाद्यान्न प्याकेजहरु ६० घरलाई उपलब्ध गराइएको थियो। बाढीपीडितका लागि १ हजार २ सय ४२ सेट राहत सामग्री परिचालनमा सहयोग गरेको विभागले जनाएको छ। यसमा ब्रस, मञ्जन, गम्छा, साबुन, स्यानिटरी प्याड, प्रेसर कुकर, ब्ल्यांकेट, झुल, स्लिपिङ म्याट, पानीका जार डिस्पेन्सर र मग, चामल ,तेल, दलहन लगायतका अत्यावश्यकी सामग्री उपलब्ध गराइएको विभागले प्रेस विज्ञप्तिमार्फत जनाएको छ।
यस्तै यूएई रेड क्रिसेन्टले बाढी र डुबानबाट प्रभावित विभिन्न ९ जिल्लाका लागि खाद्यान्न र लत्ताकपडा वितरण गरेको छ। संयुक्त अरब इमिरेट्स यूएई दूताबासको सहयोग तथा नेपाल सरकारसँगको समन्वयनमा कैलाली, कंचनपुर, बाँके, बर्दिया, कपिलबस्तु, मोरङ, सुनसरी, सप्तरी र महोत्तरीका विभिन्न गाउँमा प्रभावित परिवारलाई राहत वितरण गरिएको रेड क्रिसेन्टले विज्ञप्ति मार्फत जनाएको छ ।
सेक्टेम्बर महिना भरी पीडित बनेका परिवारका लागि २० हजार थोक खाद्यान्न, ७ हजार ३ सय मेडिकल किट, ४ हजार २ सय ३६ त्रिपाल वितरण गरिएको संस्थाले जनाएको छ । विपद्मा परेकाहरुका लागि दोस्रो चरणको राहत समेत चाडै वितरण गर्ने क्रिसेन्टले उल्लेख गरेको छ ।
यस्तै नख्खु खोलाले घरवास बगाएर खान र बस्नका लागि भौँतारिरहेका पीडित नागरिकहरुका लागि गाँसवासको टुंगो नहुँदा स्थानीयहरु मिलेर उनीहरुलाई खान र बस्नको व्यवस्था गरिरहेका छन् ।
गत आईतवारदेखि ललितपुर महानगरपालिका वडा नम्बर २५ स्थित नख्खु खोला आसपासका पीडितहरुलाई स्थानीहरु मिलेर दुई छाक नै खाना खुवाइरहेका छन् । २५ नम्बर वडाका वडाध्यक्ष दौलतकुमार खत्रीले सहयोगी दाताहरुले एकद्वारा प्रणालीबाट वडामा आइ सहयोग गरिरहेको र सोही सहयोगबाट पीडितहरुलाई खाने र बस्ने स्थानको व्यवस्था गरिएको बताएका छन् ।
सो वडामा २५० जना जतिको गासवास बाढीका कारण खोसिएको छ भने २ जनाको मृत्यु भएको उनले बताएका छन् । अविरल वर्षाका कारण देशभर नै ठूलो जनधनको क्षति भएको छ । हजारौँ मानिसहरु बिस्थापित भएका छन् । अझै पनि मनसुन सफा भइसकेको छैन । त्यसैले विज्ञहरुले सतर्कता अपनाउन सुझाव दिइरहेका छन् ।
