२२ असोज , एजेन्सी ।
ब्राजिलियन फुटबलका सुपरस्टार नेयमार जुनियर बेला–बेला चर्चामा आइरहन्छन् । चोटका कारण लामो समयदेखि आफ्नो देश र आफू आबद्ध क्लबका लागि खेल्न नपाएका नेयमार मैदानबाहिर रहँदा पनि विभिन्न विषयमा समाचारका ‘हेडलाइन’ भने बनिरहेका छन् ।
खेल कौशलबाहेक पनि बिलाशी जीवन बिताउन खोज्ने नेयमार यसपटक भने टापु किन्ने खबरले चर्चामा आएका हुन् । ३२ वर्षीय नेयमारले ७ मिलियन अमेरिकीडलर बराबरको एक निजी टापुमा आँखा लगाएको चर्चा छ ।
नेमारले ब्राजिलको तटनजिकै अवस्थित सुन्दर जापाओ प्राइभेट आइल्यान्डमा आफ्नो ध्यान केन्द्रित गरेको अन्तर्राष्ट्रिय मिडियाहरूले उल्लेख गरेका छन्।हाल एसिएल चोटका कारण झण्डै एक वर्षसम्म मैदानबाट बाहिर रहने अल–हिलालका स्टार आफ्नो ध्यान विलाशी जीवनतर्फ मोड्दै गरेको जस्तो देखिन्छ।
६ एकड अर्थात् ९ दशमलव ६८ बिघा क्षेत्रफलमा फैलिएको यो टापु विलाशिताको प्रतीक हो, जसमा चार भव्य भिल्ला, जकुजी (तातोपानीसहितको आरामदायी पोखरी), पौडी पोखरी र पैसाले किन्न सकिने लगभग हरेक सुख–सुविधा छन्।
अंग्रा दोस रेइस बन्दरगाह नगरको नजिक अवस्थित यो टापु नेयमारजस्ता व्यक्तिका लागि सार्वजनिक नजरबाट लुक्न उत्कृष्ट स्थान हो। यस सम्पत्तिमा इन्डोनेसियाली शैलीका दुई भिल्ला छन् जसमा मास्टर स्विट, शान्त,जापानिज कोई माछा पोखरी र समुद्र दृश्यावलोकन गर्न सकिने तीन बंगला छन्।
टापुका क्यानाडेली मालिकले छिटो बिक्री गर्ने आशामा मूल्य ३ मिलियनभन्दा बढीले घटाएपछि नेयमार हौसिएको रिपोर्टमा जनाइएको छ । ब्राजिलियन पत्रकार लियो डियासका अनुसार नेयमार र दुबईका सम्पत्ति व्यवसायी शेख मुहम्मद बिनघट्टीले यस महिनाको अन्त्यतिर टापु भाडामा लिन पहिले नै ४० हजार डलरभन्दा बढी खर्च गरिसकेका छन् ।
यो एक प्रकारको “टेस्ट ड्राइभ’ हो, जसले यो उनीहरूका लागि उपयुक्त छ कि छैन भनेर तय गर्नेछ। रोचक कुरा के छ भने यो नेयमारको टापुसँगको पहिलो ‘कनेक्सन’ भने होइन । उनकी पूर्वप्रेमिका ब्रुना मार्केजिन यहाँ पहिले नै बिदा मनाइसकेकी अन्य धेरै सेलिब्रिटीहरूमध्ये एक हुन्।
यो एकान्त स्वर्गमा १० जनासम्म पाहुनाहरू बस्न सक्छन् र यहाँसम्म डुंगा वा हेलिकोप्टरबाट मात्र पुग्न सकिन्छ। चासो राख्नेहरूका लागि, रियो दि जेनेरियोको अन्तर्राष्ट्रिय विमानस्थलबाट हेलिकोप्टर यात्रा लगभग ३५ मिनेट लाग्छ।
यसरी नेयमार फुटबल मैदानबाट टापु जीवनमा प्रवेश गर्न तयार देखिन्छन् । मैदानमा आफ्नो प्रदर्शन र कौशलताले लठ्ठ पार्नसक्ने क्षमताका धनी नेयमार अहिले चोटकै कारण मैदान फर्किन पाएका छैनन् ।
बार्सिलोनाबाट सर्वाधिक धेरै सरुवा रकममा फ्रान्सेली क्लब पेरिस सेन्ट जर्मेन (पिएसजी) पुगेका नेयमार हाल साउदी अरेबियन हल हिलालसँग छन् । गोलमा पास मिलाउन सिपालु नेयमार आफ्ना देशका लागि सर्वाधिक धेरै असिस्ट गर्ने खेलाडी हुन् ।
त्यसबाहेक नेयमार २१औं शताब्दीमा राष्ट्रिय टोलीहरूमा सबैभन्दा धेरै असिस्ट गर्ने खेलाडी पनि हुन् । सन् २०१० मा १८ वर्षको उमेरमा ब्राजिलका लागि डेब्यु गरेका नेयमारले ७९ गोलसमेत गरेका छन् ।
उनी ब्राजिलका सर्वाधिक गोलकर्ता पनि हुन् । ब्राजिलका लागि ७७ गोल गरेका पेलेजस्तो खेलाडीलाई उनले उछिनेका छन् । सन् २०१६ मा भएको रियो ओलम्पिकमा घरेलु राष्ट्र ब्राजिललाई स्वर्ण पदक दिलाएका छन्, नेयमारले ।
तर, आफ्नो करिअरको अधिकांश समय चोटबाट उन्मुक्त हुन नै बिताउनुपर्ने बाध्यताका कारण पनि उनलाई फुटबल समर्थकले बिर्सिने अवस्थामा पुगेका छन् । यसबीचमा टापु किन्ने खबरले उनलाई फेरि एकपटक मिडियाको हेडलाइन बनाइदिएको छ ।
