२४ असोज , विराटनगर।
नेपालमा हवाई दुर्घटनाका कारणहरुमा खराब मौसम सबैभन्दा प्रमुख कारण हो भने त्योसंगै एयरलाइन्स, पाइलट वा अनुगमन गर्ने नियामक निकायहरुका कमजोरी पनि धेरै दुर्घटनाहरुमा कारण रहेको पाइन्छ । अनि कहिलेकाँही यात्रुले पनि जानीनजानी दुर्घटना निम्त्याउने काम गरिरहेका हुन्छन् ।
आज एक यात्रुले यस्तै जोखिमपूर्ण काम गरेका छन् ।आज बिहान विराटनगरबाट जनकपुर उडानमा रहेको बुद्ध एयरको आपत्कालीन ढोका एक यात्रुले खोलिदिएका छन् । बुद्ध एयरले दिएको जानकारीअनुसार बिहीबार बिहान जनकपुर विमानस्थलको अनुकूल मौसम नहुँदा काठमाडौँबाट गएको जहाज विराटनगरमा अवतरण गरेको थियो ।
यस क्रममा यात्रुले विराटनगर विमानस्थलमा विमानको आपत्कालीन ढोका खोलिदिएका हुन् । यात्रुले आपत्कालीन ढोका खोल्दा उडान प्रक्रिया नै अवरुद्ध भई उडान तालिका प्रभावित भएको बुद्ध एयरले जनाएको छ ।
योसमेत ९ दिनभित्र बुद्धका विमानमा यात्रुले आपत्कालीन ढोका खोलिदिएका ३ घटना भइसकेका छन् । बुद्ध एयरले दिएको जानकारीअनुसार अक्टोबार २ मा विराटनगरबाट काठमाडौँ, अक्टोबर ७ मा नेपालगन्जबाट काठमाडौँ र आज (अक्टोबर १०) फेरि विराटनगरबाट जनकपुर उडानमा रहेको बुद्ध एयर विमानको इमरजेन्सी ढोका यात्रुले खोलिदिएका हुन् ।
त्यसरी आपत्कालीन ढोका खोल्ने यात्रुलाई विमानस्थल सुरक्षाकर्मीलाई जिम्मा लगाउने गरिएको बुद्ध एयरले जनाएको छ । हवाई उडानमा खलल पु¥याउने जोसुकैलाई ‘गैरसैनिक हवाई उडान ऐन, २०१५’ अनुसार १ देखि ३ वर्षसम्म कैद तथा अपराधको प्रकृति हेरी जन्मकैदसम्म सजाय हुने प्रावधान छ ।
त्यसबाहेक उडान सुरक्षामा खलल पु¥याउने यात्रुलाई विमान सेवा प्रदायक कम्पनीले उडानमा थप प्रतिबन्ध लगाउने गरेका छन् । आपत्कालीन ढोकाको प्रयोगबारे विमान कम्पनीका परिचारिकाले उडानअगावै यात्रुलाई जानकारी गराएका हुन्छन् ।
आपत्कालीन ढोका अत्यावश्यक अवस्थाबाहेक खोल्न मिल्दैन, यसले उडान सुरक्षामै असर पार्छ । अर्काेतर्फ काठमाडौंको त्रिभुवन अन्तर्राष्ट्रिय विमानस्थलमा आज बिहान उत्रिएको कुवेत एयरलाइन्सको विमानले लगेज छुटाइदिएपछि यात्रुहरु मर्कामा परेका छन् ।
कुवेत एयलाइन्सको उडान नम्बर केयू ३९१ विमान आज बिहान साढे ६ बजे त्रिभुवन अन्तर्राष्ट्रिय विमानस्थलमा ओर्लिएको थियो । तर यात्रुहरुले आफ्ना लगेज पाएनन् । सोही विमान चढेर काठमाडौं आएका एक यात्रुले दशैं मनाउन आउँदा लगेज नै छुटेपछि खल्लो लागेको बताए ।
करिब ८० प्रतिशत यात्रुको लगेज छुटेको छ । यात्रुहरुले काठमाडौंको त्रिभुवन अन्तर्राष्ट्रिय विमानस्थलमा रहेको कुवेत एयरलाइन्सको कार्यालयमा लगेज दाबी गर्दै निवेदनसमेत दिएका छन् । त्यस्तो निवेदनलाई ‘प्रपर्टि इरेगुलारिटी रिपोर्ट –पी.आई.आर’ भनिन्छ ।
कुवेत एयरलाइन्सका कर्मचारीहरुले आगामी सोमबारसम्म सुरक्षित रुपमा लगेज उपलब्ध गराउने बताएका छन् ।
