काठमाडौं,असोज ८
विकासोन्मुख राष्ट्रका बीमा कम्पनीहरुको २१ औं सम्मेलन मंगलबारदेखि राजधानीमा सुरु हुँदैछ । दुई दिन चल्ने सम्मेलनमा विकासोन्मुख राष्ट्रका बीमा कम्पनीहरु, पुनर्बीमा कम्पनी, बीमा क्षेत्रका नियामक निकायहरुको सहभागिता रहनेछ । प्राकृतिक विपत्तिमा बीमा क्षेत्रका लागि अवसरको खोजी गर्न २१ औं सम्मेलन आयोजना गर्न लागिएको हो ।
सम्मेलनमा विकासोन्मुख २० देशबाट १५० भन्दा बढि सहभागीहरु काठमाडौं आईपुगेका छन् ।विकासोन्मुख राष्ट्रका बीमा कम्पनी र रि इन्स्योरेन्स कम्पनीको छाता संस्था एसोसियसन अफ इन्युरर्स एण्ड रि इन्स्योरेन्स अफ डेभलपिङ कन्ट्रिज(एआईआरडीसी)को २१ औं सम्मेलनको आयोजना गरेको हो ।
सम्मेलनमा प्राकृति विपत्तिको जोखिम न्युनीकरणमा रि इन्स्योरेन्स कम्पनीको भूमिका, बीमा कम्पनीहरुको डिजिटलाइजेशन, माईक्रो इन्स्योरेन्स लगायतका बिषयमा विज्ञहरुले कार्यपत्र प्रस्तुत गर्नेछन् ।
सम्मेलनबाट प्राप्त सुझाव र निष्कर्षलाई बीमा क्षेत्रको नियमनका क्रममा उपयोग गर्ने बीमा समितिका अध्यक्ष चिरञ्जीवी चापागाइँले बताए ।
५०० नेपाली र १५० विदेशी गरि ६५० जना बीमा क्षेत्र सम्वद्ध व्यक्तिहरुले सम्मेलनमा प्रत्यक्ष सहभागिता जनाउनेछन् ।
एआईआरडीसीमा नेपाल सहित २९ वटा विकासोन्मुख राष्ट्रका जीवन तथा निर्जीवन बीमा कम्पनी र नियामक निकाय सदस्य रहेका छन् । एआईआरडीसीले प्रत्येक २ बर्षमा सम्मेलन गर्दै आएको छ । यसपालिको सम्मेलन नेपालले आयोजना गर्न लागेको हो । सम्मेलनपछि हाल उपाध्यक्षको जिम्मेवारीमा रहेका विजय बहादुर शाहले अध्यक्षको जिम्मेवारी प्राप्त गर्नेछन् ।
खर्चमा असन्तुष्टि
सम्मेलन आयोजना गर्न लाग्ने अनुमानित २ करोड रूपैयाँ बीमा कम्पनीहरूबाट संकलन गरिएको छ । सम्मेलनका लागि प्रत्येक बीमा कम्पनीहरुले ४ लाख रकम उपलब्ध गराएका छन् । बीमा समितिले ३० लाख रुपैंयाँ उपलब्ध गराएको छ भने नेपाल पुनर्बीमा कम्पनले पनि ३० लाख नै उपलब्ध गराएको छ ।
सम्मेलनका लागि ३८ बीमा कम्पनीहरुबाटै १ करोड ५२ लाख संकलन हुन्छ । त्यस्तै बीमा समिति र पुनर्बीमा कम्पनीहरुको रकम समेत जोड्दा २ करोड १२ लाख रुपैंयाँ संकलन हुन्छ ।
एउटा बीमा कम्पनीले चार लाख रुपैंयाँ तिरे वापत कम्पनीका अध्यक्ष, प्रमुख कार्यकारी अधिकृत र पाँच जना कर्मचारीले सम्मेलनमा सहभागिता जनाउन सक्नेछन् । अन्य कर्मचारी सहभागी हुन चाहेमा भने प्रति व्यक्ति १५ सय रुपैंयाँ तिर्नुपर्नेछ । विदेशबाट सम्मेलनमा सहभागी हुन आउनेहरुले प्रति व्यक्ति ५ सय अमेरिकी डलर तिर्नुपर्छ ।
सम्मेलन आयोजनाका लागि बीमा कम्पनीहरुबाट शुल्क असुलिएकोमा केही बीमा कम्पनीले असन्तुष्टि प्रकट भएको छ । बार्षिक करोडौं रुपैंयाँ आम्दानी गर्ने बीमा समितिले सम्मेलनका लागि भनेर बीमा कम्पनीहरुसँग समेत रकम उठाएको भन्दै असन्तुष्ठि जनाएका छन् ।
गत आर्थिक बर्षमा बीमा कम्पनीहरुले ७३ अर्ब प्रिमियम संकलन गरेका थिए । सो प्रिमियमको एक प्रतिशतका दरले ७३ करोड रुपैंयाँ बीमा समितिको कोषमा गएको छ ।
‘समितिको कोषमा अर्बौं रकम छ, तैपनि सम्मेलनका लागि कम्पनीहरुसँग चाररचार लाखका दरले रकम असुलियो, त्यसो नगरेको भए राम्रो हुन्थ्यो’, एक इन्स्योरेन्स कम्पनीका प्रमुख कार्यकारी अधिकृतले भने ।
यस्ता कार्यक्रम आयोजना गर्न पुर्नबीमा कम्पनीका ब्रोकरहरू खर्च गर्न तयार भए पनि नेपाली आफैले यस्तो कार्यक्रम गर्ने निर्णयमा पुगिएको र यसले नेपाली बीमा कम्पनीहरूको छवि अन्तर्राष्ट्रिय जगतमा राम्रो देखिने आयोजकले जनाएको छ ।(विकास न्युजबाट)
