५ कार्तिक , एजेन्सी ।
ब्राजिलका राष्ट्रपति लुला डा सिल्भाले आफ्नो आगामी रुस भ्रमण रद्द गरेका छन् । उनी रुसमा हुन लागेको ब्रिक्स सम्मेलनमा सहभागी हुन त्यसतर्फ जाँदै थिए ।
तर शनिबार सिल्भा आफ्नै घरमा दुर्घटनामा परेका छन् ,उनको टाउकोमा चोट लागेको थियो । सिल्भा ब्रिक्स सम्मेलनमा सहभागी हुन आइतबार नै रुस प्रस्थान गर्नेवाला थिए ।
‘हामीले राष्ट्रपतिलाई तत्कालका लागि लामो दुरीको हवाई यात्रा नगर्न सल्लाह दिएका छौँ । अब उनले भिडियो कन्फरेन्स मार्फत यो सम्मेलनमा भाग लिनेछन’ ब्राजिलको राजधानी ब्रासिलियाको एक प्रमुख अस्पतालले भनेको छ ।
स्थानीय सञ्चारमाध्यमले चिकित्सकलाई उद्धृत गर्दै सिल्भालाई पाँच वटा टाँका लगाएपछि घर पठाइएको बताएका छन् ।
यसअघि रुसी राष्ट्रपति पुटिनले शुक्रबार ब्राजिलमा आगामी महिना हुने जी–२० सम्मेलनमा सहभागी नहुने बताएका थिए ।
रुसको अध्यक्षतामा काजानमा १६ औँ ब्रिक्स सम्मेलन हुँदैछ ।
रुसमा हुन लागेको यस सम्मेलनको नारा ‘समान विश्वव्यापी विकास र सुरक्षाका लागि बहुपक्षीयतालाई बलियो बनाउने’ भन्ने रहेको छ ।
ब्रिक्स ब्राजिल, रुस, भारत, चीन र दक्षिण अफ्रिका समेत पाँच विकासोन्मुख राष्ट्रहरूको समूह हो ।
