१२ कार्तिक , काठमाण्डौ।
साफ वुमन्स च्याम्पियनसिप २०२४ को लागि नेपाल र बंगलादेश भिड्ने भएका छन् । नेपाल र बंगलादेशले आइतबार सेमिफाइनल जित्दै फाइनल भेट पक्का गरेका हुन् । यसअघि २०२२ मा काठमाडौं मै भएको साफको उपाधिका लागि पनि यी दुई टोली भिडेका थिए ।
जहाँ नेपाललाई हराएर बंगलादेश पहिलो पटक च्याम्पियन बनेको थियो । सातौं संस्करणको च्याम्पियनसिपको आइतबारको पहिलो सेमिफाइनलमा साविक विजेता बंगलादेशले भुटानलाई ७–१ ले हराएर फाइनलमा स्थान बनाएको छ ।
घरेलु टोली नेपालले भने तनावग्रस्थ सेमिफाइनलमा पाँच पटकको विजेता भारतलाई पेनाल्टीसुटआउटमा ४–२ ले पराजित गर्दै फाइनल पुगेको छ । अब फाइनल खेल बुधबार हुनेछ । नेपाल समग्रमा छैटौं पटक र बंगलादेश तेस्रो पटक फाइनल पुगेको हो ।
लगातार तेस्रो पटक घरेलु मैदानमा साफ वुमन्स च्याम्पियनसिप खेलिरहेको नेपाली टोली यस पटक च्याम्पियन बन्ने लक्ष्यमा छ । फाइनलको ढोका खोल्नुअघिको सेमिफाइनलमा भने हिजो भारतसंगको नेपालको खेल निकै तनावग्रस्थ बन्यो ।
खेलको पहिलो हाफ गोलरहित बराबरीमा सकिँदासम्म स्थिति सामान्य नै थियो । तर, ५२औँ मिनेटमा रेखा पौडेलले दोहोरो पहेलो कार्डपछि रातो कार्डसहित मैदान छोडेपछि खेलले बेग्लै रुप लियो ।
भारतीय डिफेन्स लाइनमा विपक्षी डिफेन्डरमाथि हवाई जम्प गर्दा उनलाई भुटानी फिफा रेफ्री ओम चोकीले दोस्रो पहेलो कार्डसँगै रातो कार्ड देखाउन हिचकिचाहट देखाइनन् । त्यसअघि उनले पहिलो हाफको इन्जुरी समयमा पहिलो पहेलो कार्डको सामना गरेकी थिइन् ।
रेखा बाहिरिएसँगै नेपाल १० खेलाडीमा सीमित भएको थियो । रेखाले पाएको कार्डप्रति असन्तुष्ट बनेका दर्शकले ५२औँ मिनेटदेखि नै मैदानमा पानी र कोल्ड ड्रिक्सका बोतल प्रहार गरेका थिए । जसका कारण खेल करिब १५ मिनेट रोकिएको थियो ।
खेल पुनः सुरु हुँदा नेपालले १० खेलाडीमा खेलेको थियो । ६२औँ मिनेटमा भारतकी संगीता बासफोरेले गोल गर्दै आफ्नो टिमलाई अग्रतामा राखेकी थिइन् । गोलपछि सेलिब्रेसन गर्न भारतका सबै खेलाडी मैदान छोडेर बाहिर आए ।
यही स्थितिमा नेपालले रेफ्रीको अनुमतिमा खेल सुरु गर्दै भारतीय खेलाडी नहुँदाको अवसर सदुपयोग गरेर गोल गरेको थियो । नेपालकी प्रीति राईले गोल गर्दै टिमलाई बराबरीमा फर्काएकी थिइन् । तर, रेफ्रीकै प्ले अनमा खेल सुरु भए पनि नेपालको गोललाई भने उनले मान्यता दिइनन् ।
यसपछि उब्जिएको तनावले खेल पुनः ५ मिनेटभन्दा धेरै समयका लागि रोकियो । रेफ्री गोललाई मान्यता नदिने निर्णयमा अडिग रहिन् । नेपालले पुनः मध्यबाट खेल सुरु गर्यो । तर, खेल सुरु भएको केही सेकेन्डमै दर्शकबाट पुनः बोतल र कोल्ड ड्रिंक्सका बोतल फ्याक्न थालेपछि खेल फेरि रोकिएको थियो ।
यसपछि भने नेपाली खेलाडीले पनि खेललाई निरन्तरता दिने मनसाय देखाएनन् । दर्शकबाट बनेको तनावग्रस्त वातावरण र नेपाली खेलाडी पनि रुष्ट बन्दा खेल १ घण्टा १५ मिनेटसम्म सुरु हुन सकेन ।
रंगशालामा उपस्थित भएकाहरूका निम्ति यो कुनै आश्चर्यभन्दा कम थिएन । यस अवधिमा नेपालकी सावित्रा भण्डारी मैदान नै छोडेर चेन्जिंग जाने आउने गरिरहेकी थिइन् । “रेफ्रीले गोल नदिनुमा दुई कारण देखाइन् । पहिले विपक्षी टिमका प्रशिक्षक मैदानभित्र रहेको र दोस्रो अर्को टिमको गोलकिपर आफ्नो पोजिसनमा नभएको ।
यी दुवै कारण नियमअनुसार थिएनन् । यसैकारण नेपाली खेलाडी खेल अघि नबढाउने मनसायमा पुगे,” मैदानमा भएको घटनाबारे स्पष्टीकरण दिँदै नेपाली टिमका मुख्य प्रशिक्षक राजेन्द्र तामाङले भने १ घण्टा १५ मिनेट रोकिएपछि खेल पुनः सुरु भयो ।
भुटानी रेफ्रीले ६३औँ मिनेटबाट खेल पुनः सुचारु गरेका थिए । “हाम्रा खेलाडी खेललाई निरन्तरता दिन मानिरहेका थिएनन् । तर, आयोजक साफबाट खेलको नतिजा भारतको पक्षमा जाने र आगामी प्रतियोगितामा निलम्बितसमेत हुनसक्ने भन्दै तर्साएपछि भने हामीले नेपालको एफएको इज्जतको लागि भए पनि खेललाई निरन्तरता दिने निर्णयमा पुग्यौँ,”।
खेल सुरु भएको अर्को मिनेटमा नै १० खेलाडीमा खेलिरहेको नेपालले बराबरी गोल फर्कायो । प्रीति राईले मध्यक्षेत्रबाट निकालेको थ्रो बललाई साम्बाले नियन्त्रण लिँदै सुन्दर काउन्टर गोल गर्दा नेपाल खेलमा फर्किएको थियो ।
गोलको खुसियाली मनाउने क्रममा उनले अविश्वसनीय रूप पनि देखाइन । यसपछि निर्धारित ९० मिनेटसम्म दुवै टिमबाट गोल भएन । अनि नतिजाका लागि पेनाल्टीतर्फ धकेलिएको थियो ।
अन्ततः साबित्रा भण्डारी साम्बाको एग्रेसन र गोल अनि पेनाल्टी सुटआउटमा अन्जनाको बचाउमा नेपालले भारतलाई पेनाल्टी सुटआउटमा ४–२ ले हराएर लगातार दोस्रोपटक साफ वुमन्स च्याम्पियनसिपको फाइनलमा स्थान बनायो ।
नेपालले साफमा भारतलाई लगातार दोस्रोपटक हराएको हो भने समग्रमा छैटौंपटक साफको फाइनलमा पुगेको हो । यसबीच भारतीय प्रशिक्षक सन्तोष कश्यपले नेपाली टिम जितको हकदार भएको बताउदै नेपाली टिमलाई शुभकामना पनि दिए ।
खेलमाथि आफ्नो टिमको पकड रहेर पनि त्यसलाई गुमाउनुपरेको उनले स्वीकार गरे । हिजोको खेलमा दर्शकको उत्साह पनि अथाह देखियो । सेमिफाइनल खेल हेर्न दशरथ रंगशालाको फुटबल मैदानमा १८ हजारभन्दा बढी उपस्थित भएका थिए ।
जबकी दशरथ रंगशालाको क्षमता भने १५ हजार हो । रंगशालाको भीआईपी तथा साधारण सबैतिरका प्याराफिट भरिभराउ थियो । सिटमा नअटेर मान्छे हिँड्ने ठाउँमा पनि दर्शक थिए भने बस्ने ठाउँ नपाएर उभिएका थिए ।
