२६ कार्तिक, काठमाण्डौ।
केही दिनयता दिनहुँ यात्रुवाहक सवारीसाधन दुर्घटनामा परिरहेका छन् । जसमा परि कयौंले ज्यान गुमाएका छन् । आज पनि विहानै बागलुङको जैमिनी नगरपालिका– ७ जैदीको व्यार्थला नजिकै ‘पिकअप भ्यान’ दुर्घटना हुँदा पाँचजनाको मृत्यु भएको छ ।
हिजो आइबार र त्यसअघि शनिबार पनि सवारी दुर्घटनामा परि दर्जनबढीको ज्यान गएको छ । आज विहानै बागलुङको जैमिनी नगरपालिका–८ छिस्तीबाट जिल्ला सदरमुकाम बागलुङ बजार आउँदै गरेको ग २ च ९२४७ नम्बरको भ्यान बिहान दुर्घटना हुँदा चालकसहित पाँचजनाको मृत्यु भएको हो ।
मृत्यु हुनेहरुमा जैमिनी नपा–०८ केवई बस्ने जिप चालक ३८ वर्षीय महेन्द्र पुन, सोही ठाउँ बस्नेहरु २० वर्षीय रश्मी श्रीष, ५० वर्षीय नन्दकली पुन, १७ वर्षीय निरज श्रीष र ७५ वर्षीय कुल प्रसाद श्रीष रहेका छन् ।
दुर्घटनामा जैमिनी नपा ०८ केवई बस्ने ४५ वर्षीय गंगाबहादुर श्रीष घाइते भएका छन् । जिल्ला ट्राफिक प्रहरी प्रमुख प्रहरी नायव निरीक्षक सुमन निउरेका अनुसार ६ जना सवार भ्यानमा गम्भीर घाइते भएका एक जनाको जीवितै उद्धार गरिएको छ ।
उनलाई थप उपचारका लागि धौलागिरी अस्पताल बागलुङ ल्याइएको छ । घटनाको थप विवरण आउन बाँकी रहेको थापाले बताए । यता गएराति रौतहटमा कार र धानझार्ने थ्रेसर मेसिन बोकेको ट्याक्टर आपसमा ठोकिँदा एक मजदुरको मृत्यु भएको छ ।
पूर्वपश्चिम राजमार्गको जंगल क्षेत्रमा पर्ने चन्द्रपुरस्थित पौराइमा आइतबार राति करिब आठ बजे लु ५ त १४०९ नम्बरको ट्याक्टर र बीएसी ५६०३ नम्बरको कार आपसमा ठोकिँदा भारतको पूर्वी चम्पारण घर भएका ४० वर्षीय भोला गिरीको मृत्यु भएको हो ।
जिल्ला प्रहरी कार्यालय रौतहटका डीएसपी दीपककुमार रायले दिएको जानकारी अनुसार पौराइको गाउँमा धान झारेर पूर्वपश्चि राजमार्गमा निस्कँदै गरेको ट्याक्टरसँग तीव्र गतिमा पूर्वबाट पश्चिमतर्फ जाँदै गरेको कार ठोकिँदा दुर्घटना भएको हो ।
‘दुवै चालकको असावधानीको कारण दुर्घटना भएको देखिन्छ,’ डीएसपी रायले भने,‘दुर्घटनापछि चितवनको भरतपुर महानगरपालिका– २ घर भएका कार चालक दल्लु बनसललाई पक्राउ गरेका छौँ।’ मृतक गिरी बिग्रिएको थ्रेसर मेसिन बनाउन गएको बेला घटना भएको रायले बताए ।
धान झार्ने क्रममा बिग्रिएको थ्रेसर बनाएर सोही ट्याक्टरमा चढेर डेरा फर्किंदै गर्दा दुर्घटना भएको हो । मृतक गिरीको शव पोस्टमार्टमका लागि चन्द्रपुर अस्पतालमा राखिएको छ । हिजो पनि सुर्खेतस्थित कालीकोटमा क्षमताभन्दा तेब्बर बढी यात्रु बोकेको बोलेरो दुर्घटना हुँदा ७ जनाको मृत्यु भएको छ ।
६ जनाको घटनास्थलमै र एकको प्रदेश अस्पताल सुर्खेतमा उपचारका क्रममा मृत्यु भएको हो । १३ जना घाइते छन । पलाता गाउँपालिका–३ राडुनेटामा बोलेरो दुर्घटना भएको हो । दुई वर्षअघि ट्र्याक खुलेको सडकमा उकालो चढ्न नसक्दा बोलेरो सडकबाट ५ सय मिटर तल खसेको थियो ।
उक्त बोलेरो खिनबाट पलाता जाँदै गरेको कर्णाली प्रदेश प्रहरी कार्यालयले जनाएको छ । प्रहरीका अनुसार कर्णाली १ज५६ नम्बरको उक्त बोलेरो ५ यात्रु सिट पास भए पनि चालकसहित २० जना सवार थिए ।
कालीकोटका प्रहरी प्रमुख डीएसपी टेकबहादुर रावतका अनुसार दुर्घटनामा पलाता–६ की दशकला शाही, पदम बम, भगवती रोकाया र गणेश शाही, पलाता–५ की छाया शाही, पलाता–३ का दमन रोकाया र सल्यान घर भएका ४५ वर्षीय चालक धनीराम रावतको मृत्यु भएको छ ।
घाइते भएका पलाता–६ का केशव थापा, किशोर थापा, विजय थापा, रिदम शाही, प्रतीक्षा शाही, आशिष रोकाया र भूपेन्द्र रोकाया, पलाता–५ का दोली विक र आयुशा विक, पलाता–३ का दानबहादुर रोकाया, निर्मला रोकाया र जगत रोकायालाई सेनाको हेलिकोप्टरबाट प्रदेश अस्पताल सुर्खेत लगेर उपचार भइरहेको प्रहरीले जनाएको छ ।
एक जना यात्रु सामान्य घाइते भएका छन । नेपाली सेनाका महासेनानी दीपध्वज खड्काको टोलीले घाइतेहरूको उद्धार गरेर प्रदेश अस्पताल पु¥याएको थियो । घाइते यात्रुका अनुसार ओभरलोड बोलेरो साँघुरो सडकमा उकालो चढ्न नसकी ‘ब्याक’ भएर तल खसेको हो ।
बोलेरोभित्र १० जना र पछाडि १० जना यात्रु सवार रहेको घाइते भूपेन्द्र रोकायाले बताए । उनका अनुसार दुर्गम गाउँमा अन्य सवारीसाधन नचल्ने हुँदा कोचाकोच गरेर एउटै गाडीमा चढ्नुपर्ने बाध्यता छ ।
शनिबार मात्रै दैलेखबाट सुर्खेत आउँदै गरेको गाडी दुर्घटना हुँदा चार जनाको मृत्यु भएको थियो । शनिबार मात्र सुर्खेतमै चार वटा सवारीसाधन दुर्घटना भएका थिए । सुर्खेत प्रहरी प्रमुख एसपी रूपेश खड्काले क्षमताभन्दा बढी यात्रु बोक्ने सवारीसाधनमाथि कारबाही सुरु गरेको बताएका छन् ।
