१७ मंसिर , काठमाण्डौ ।
प्रधानमन्त्री केपी शर्मा ओली उत्तरको छिमेकी चीनको ४ दिने औपचारिक भ्रमणका लागि आज त्यसतर्फ प्रस्थान गरेका छन् । प्रधानमन्त्री बेइजिङ उड्नु अघि र पछि त्रिभुवन विमानस्थलबाट हुने अन्य कुनै पनि विमानको उडान अवतरण बन्द गरिएको थियो ।
तर यसपटकको प्रधानमन्त्रीको विदेश भ्रमणमा विगतको जस्तो उच्चपदस्थ अधिकारीहरुको लावालस्कर भने देखिएन । हरेकपटक राष्ट्रपति÷प्रधानमन्त्रीको विदेश भ्रमणमा विमानस्थलमा बिदाईका लागि भीआईपीहरूको लावालस्कर पुग्ने गर्छ ।
सभामुख, राष्ट्रियसभा अध्यक्षदेखि अधिकांश मन्त्रीहरू विमानस्थलमा बिदाई गर्न जाने गरेका छन् । तर आज प्रधानमन्त्री चीन जाँदा त्यस्तो लावालस्कर देखिएन । सभामुख देवराज घिमिरे र राष्ट्रियसभा अध्यक्ष नारायण दाहाल विमानस्थल गएनन् ।
उपप्रधानमन्त्री प्रकाशमान सिंह र गृहमन्त्री रमेश लेखकमात्रै विमानस्थलमा पुगेका थिए । यसको कारण भनेको चाँही नयाँ आएको कार्यविधी हो । अति विशिष्ट व्यक्ति तथा विशिष्ट व्यक्तिहरूको सुरक्षा व्यवस्थापन कार्यविधि संशोधन गरिएको छ ।
मन्त्रीपरिषद्बाट पहिलो संशोधन भएको उक्त कार्यविधि सोमबार बिहान प्रधानमन्त्री केपी शर्मा ओलीको चीन भ्रमणबाट औपचारिक रूपमा कार्यान्वयनमा आएको गृह मन्त्रालयले जनाएको छ । राष्ट्रपति, उपराष्ट्रपति र प्रधानमन्त्री विदेश भ्रमण जाँदा÷आउँदा बिदाइ र स्वागतमा अन्तर्राष्ट्रिय विमानस्थलको अति विशिष्ट कक्षमा उपस्थित हुने पदाधिकारीको सङ्ख्या कटौती भएको गृह मन्त्रालयका सूचना अधिकारी दिलकुमार तामाङले बताएका छन् ।
प्रस्ताव संशोधित कार्यविधिअनुसार राष्ट्रपति विदेश भ्रमणमा जाँदा वा फर्किदा उपराष्ट्रपति, प्रधानमन्त्री, गृहमन्त्रीसहित १४ जना पदाधिकारी उपस्थित हुनुपर्ने व्यवस्था गरिएको छ । यसअघि राष्ट्रपति विदेश भ्रमणमा जाँदा वा फर्किदा उपराष्ट्रपति सहित २३ जना पदाधिकारी विमानस्थलमा उपस्थित हुने गरेका थिए । “ अति विशिष्ट व्यक्ति तथा विशिष्ट व्यक्ति विदेश भ्रमण जाँदा र फर्किदा गरिने स्वागत र बिदाइलाई प्रभावकारी बनाउन कार्यविधि संशोधन गरिएको छ,” उनले भने–“ सुरक्षा व्यवस्थापन कार्यविधि–२०८०, पहिलो संशोधन भएको हो ।”
त्यसैगरी राष्ट्रपति विदेश भ्रमणमा जाँदा र फर्किदा अन्तर्राष्ट्रिय विमानस्थलमा अति विशिष्ट कक्षदेखि जहाज चढ्न जाने मिनी कारकेडसम्म जाने पदाधिकारीको सङ्ख्या पनि घटाइएको छ । मिनी कारकेडसम्म यसअघि उपराष्ट्रपतिसहित १३ जना पदाधिकारी उपस्थित हुने व्यवस्थालाई कटौती गरेर ९ जना पदाधिकारीमा सीमित गरिएको छ ।
कार्यविधिमा कार्यवाहक प्रधानमन्त्रीदेखि शिष्टाचार महापालसम्म गरेर १३ जनाको कोटा तोकिएको छ । प्रधानमन्त्रीको भ्रमणमा विमानस्थलको विशिष्ट कक्षबाट जहाजसम्म ६ जना मात्र जान पाउने व्यवस्था छ ।
प्रधानमन्त्री मात्र होइन राष्ट्रपतिको भ्रमणमा पनि यस्तै प्रावधान तोकिएको छ । राष्ट्रपति विदेश भ्रमणमा जाँदा र फर्किदा अन्तर्राष्ट्रिय विमानस्थलमा अति विशिष्ट कक्षदेखि जहाज चढ्न जाने मिनी कारकेडसम्म जाने पदाधिकारीको संख्या पनि घटाइएको छ । मिनी कारकेडसम्म यसअघि उपराष्ट्रपतिसहित १३ जना पदाधिकारी उपस्थित हुने व्यवस्थालाई कटौती गरेर ९ जना पदाधिकारीमा सीमित गरिएको छ ।
त्यसैगरी नयाँ कार्यविधि अनुसार अब उपराष्ट्रपति विदेश भ्रमणमा जाँदा र फर्किदा प्रधानमन्त्रीसहित १२ जना पदाधिकारी उपस्थित हुनुपर्ने व्यवस्थालाई संशोधन गर्दै सो संख्या घटाएर प्रधानमन्त्रीसहित ७ जना उपस्थित हुनुपर्ने नयाँ व्यवस्था गरिएको छ ।
