१७ मंसिर , काठमाण्डौ ।
रुकुमपूर्वको पुथाउत्तरगंगाको उपाध्यक्षमा माओवादी केन्द्रकी नरपुरा बुढा विजयी भएकी छन् । यहाँ कांग्रेस–एमाले गठबन्धनको संयुक्त उमेद्वारलाई हराउँदै माओवादीले जितको झण्डा गाडेको हो । गठबन्धनको उम्मेदवार एमालेकी केशकुरमारी तुलाचनलाई पराजित गर्दै बुढा निर्वाचित भएकी हुन् ।
बुढाले ३६२७ मत ल्याउँदा एमालेकी तुलाचनले २१२८ मत पाइन् । एमालेकी तुलाचन कांग्रेसको चुनाव चिह्न रुख लिएर प्रतिस्पर्धामा थिइन् । यसअघि २०७९ मा माओवादीबाट निर्वाचित भूपेन्द्रा बुढाको दुर्घटनामा निधन भएपछि उपनिर्वाचन भएको हो ।
त्यसबेला पनि यहाँ कांग्रेस–एमाले गठबन्धनलाई पराजित गर्दै भूपेन्द्रा विजयी भएकी थिइन् । बागुलुङमा भएको दुर्घटनामा उपाध्यक्ष भूपेन्द्रासँगै वडानम्बर २ का वडाध्यक्ष जयबहादुर सीर्पालीको पनि निधन भएको थियो ।
वडाध्यक्षको उपनिर्वाचनमा भने माओवादीकै जीतबहादुर घर्ती निर्विरोध निर्वाचित भइसकेका छन् । यता हुम्लाको सर्केगाड गाउँपालिकाको उपाध्यक्षमा पनि माओवादी केन्द्रले अग्रता लिएको छ ।
माओवादीले स्थानीय तह निर्वाचन–२०७९ मा विजय हासिल गरेका अधिकांश वडा गुमाए पनि अन्य पार्टीले जितेका वडा खोसेर आफ्नो सिट संख्या कायम राख्न नेकपा माओवादी केन्द्र सफल भएको छ ।
२०७९ को आम निर्वाचनमा माओवादीले केन्द्रले जितेका ६ (एक निर्विरोधसहित) वटा वडामा यसपटक उपनिर्वाचन भएको थियो । कांग्रेसका ३ र एमालेका २ वटा वडा खोसेर माओवादीले २०७९ मा विजय हासिल गरेका वडासंख्या कायम गरेको हो ।
तर, माओवादी केन्द्रले विजय हासिल गरेका अन्य चारवटा वडा भने यसपटक गुमाएको छ । यसमध्ये हेटौँडा उपमहानगरपालिका–१२ नेपाली कांग्रेसले माओवादी केन्द्रबाट खोसेको छ । त्यहाँ नेपाली कांग्रेसका अर्जुनप्रसाद तिवारी २ हजार ६३ मतसहित विजयी हुँदा माओवादी केन्द्रका रविकुमार प्रधान १ हजार ५ सय ६० मतसहित निकटतम प्रतिद्वन्द्वी मात्र बनेका छन् ।
यो वडामा यसअघि माओवादी केन्द्रका ललितकुमार घलान १ हजार ३ सय ७१ मतसहित विजयी भएका थिए । कांग्रेसका तिवारी १ हजार ३ सय ४० मतसहित दोस्रो स्थानमा थिए । जाजरकोटको कुशे गाउँपालिका–६ पनि नेपाली कांग्रेसले माओवादी केन्द्रबाट खोसेको छ ।
पहिले माओवादी केन्द्रका मनबहादुर घर्ती ३ सय ८० मतसहित विजयी भएको यो वडामा यसपटक कांग्रेस उम्मेदवार खम्बबहादुर सिंह ३ सय ४७ मतसहित विजयी भएका छन् । माओवादी उम्मेदवार गोरखबहादुर नेपाली ३ सय ३२ मतसहित निकटतम प्रतिद्वन्द्वी बनेका छन् ।
दार्चुलाको दुहुँ गाउँपालिका–५ पनि माओवादी केन्द्रबाट नेपाली कांग्रेसको पोल्टामा गएको छ । २०७९ मा माओवादी केन्द्रका मनोरथ भट्ट ५ सय ८२ मतसहित विजयी भएको यो वडामा यसपटक कांग्रेस उम्मेदवार धनसिंह कुँवर ३ सय ७६ मतसहित विजयी हुँदा एमालेका मानसिंह बडाल ३ सय ५८ मतसहित निकटतम प्रतिद्वन्द्वी बनेका छन् ।
माओवादीले गुमाएको अर्काे वडा कालिकोटको तिलागुफा नगरपालिका–४ हो, नेमकिपाले जित हासिल गर्न सफल भएको छ । कांग्रेसको हातबाट ३ र नेमकिपाको हातबाट १ वडा गुमाएको माओवादी केन्द्रले एक वडा एमालेको हातबाट पनि गुमाउनुपरेको छ ।
महोत्तरीको रामगोपालपुर नगरपालिका–२ एमालेले माओवादी केन्द्रबाट खोस्न सफल भएको हो । यहाँ एमाले उम्मेदवार सकिबुल खाँ ६ सय ३१ मतसहित विजयी हुँदा माओवादी उम्मेदवार आइतीकुमारी यादव ५ सय ३४ मतसहित निकटतम प्रतिद्वन्द्वी बनेकी छन् ।
उपनिर्वाचनमा तीन वडा कांग्रेस र एक वडा एमालेलाई बुझाएको माओवादी केन्द्रले कांग्रेसका ३ र एमालेका २ वडा खोस्न सफल भएको छ । कांग्रेसले जितेका दुई पालिकाका प्रमुख र उपप्रमुख पनि उसले यसपटक एक्लै निर्वाचन लडेर आफ्नो पोल्टामा पारेको छ ।
यसमध्ये यसअघि नेपाली कांग्रेसले विजय हासिल गरेको उदयपुरको त्रियुगा नगरपालिका–१२ मा माओवादी केन्द्रका नवीनकुमार वान्तवा राई विजयी भएका छन् । यसैगरी नुवाकोटको ककनी गाउँपालिका–२ पनि माओवादी कांग्रेसबाट खोस्न सफल भएको छ ।
२०७९ मा सो वडामा पराजित माओवादी केन्द्रका कृष्ण घिमिरे १ हजार ८५ मतसहित विजयी भएका छन् । माओवादी केन्द्रले नेपाली कांग्रेसबाट खोसेको अर्काे वडा धनुषाको धनुषाधाम नगपालिका–१ हो।
नेपाली कांग्रेसको गढ मानिएको सो वडामा यसपटक माओवादी उम्मेदवार सुनील कापर केवट ६ सय ८४ मतसहित विजयी भएका छन्। निकतम प्रतिद्वन्द्वी नेपाली कांग्रेसका अशोककुमार मण्डलले ६ सय २ मत प्राप्त गरेका छन् ।
रामगोपालपुर नगरपालिका–२ (महोत्तरी) मा एमालेबाट प्राप्त हारको क्षतिपूर्ति माओवादी केन्द्रले गोरखा नगरपालिका–५ (गोरखा) बाट गरेको छ । त्यहाँ माओवादी उम्मेदवार विष्णुबहादुर मगर ४ सय ८६ मतसहित विजयी भएका छन्।
निकटतम प्रतिद्वन्द्वी कांग्रेसका भाइकाजी आलेले यहाँ ४ सय २ मत प्राप्त गर्दा एमाले उम्मेदवार दुर्गामाया थापा राना यहाँ ३ सय ४५ मतमा खुम्चिएकी छन् । यस्तै डोल्पाको त्रिपुरासुन्दरी नगरपालिका–५ पनि माओवादी केन्द्रले एमालेबाट खोस्न सफल भएको छ ।
त्यहाँ माओवादी केन्द्रका नरबहादुर झाँक्री १ सय ६१ मत सहित विजयी हुँदा निकटतम प्रतिद्वन्द्वी एमालेका नरबहादुर रोकाले १ सय १६ मतमात्र प्राप्त गरेका छन् । यता मोरङको ग्रामथान गाउँपालिकाको प्रमुख र जाजरकोटको नलगाढ नगरपालिकाको उपप्रमुख पद माओवादीले कांग्रेसबाट आश्चर्यजनक रूपमा खोस्न सफल भएको छ ।
यसमध्ये ग्रामथान गाउँपालिकामा माओवादीको उम्मेदवार नमोनारायण माझी ६ हजार ९ सय ६९ मतसहित विजयी भएका छन् । निकटतम प्रतिद्वन्द्वी नेपाली कांग्रेसका बलराम सरदारले यहाँ ५ हजार ३ सय ३३ मतमात्र प्राप्त गरेका छन् भने तेस्रो स्थानमा रहेका एमाले उम्मेदवार तुलसीराम विश्वासलाई ४ हजार १ सय ५९ मतमात्र प्राप्त भएको छ ।
साढे दुई वर्षपछि भएको उपनिर्वाचन परिणाम उलटपुलट पार्दै माओवादी केन्द्रले त्यहाँ आश्चर्यजनक हासिल गरेको हो ।
